ប្រធានាធិបតីរុស្ស៊ី លោក វ៉្លាឌីមៀ ពូទីន នៅថ្ងៃនេះ បានសម្រេចមិនបណ្ដេញជនជាតិអាមេរិកនោះឡើយ ជាការឆ្លើយតបទៅនឹងទណ្ឌកម្មអាមេរិក ជុំវិញការលុកលុយតាមអ៊ីនធឺណិត ដែលជំហរនេះទទួលបានការសាទរពីប្រធានាធិបតីជាប់ឆ្នោត លោក ដូណាល់ ត្រាំ។ នេះដោយយោងតាមចុះផ្សាយរបស់ទីភ្នាក់ងារព័ត៌មាន AFP។
ការសម្រេចបែបនេះរបស់លោក ពូទីន បានកើតឡើង បើទោះបីជាក្រសួងការបរទេសរុស្ស៊ី បានស្នើទៅលោក ឲ្យបញ្ជូនអ្នកកាទូតអាមេរិក ៣៥នាក់ ត្រឡប់ទៅអាមេរិកវិញ បន្ទាប់ពីលោក អូបាម៉ា បានបណ្ដេញអ្នកកាទូតរុស្ស៊ីចំនួន ៣៥នាក់ចេញពីទឹកដីអាមេរិក។
អន្តរាគមន៍របស់លោក ត្រាំ នៅលើបណ្ដាញសង្គម Twitter បានបង្ហាញឲ្យឃើញពីការផ្លាស់គោលនយោបាយការបរទេសរបស់ក្រុងវ៉ាស៊ីងតោន ៣សប្ដាហ៍មុននឹងលោក ត្រាំ គ្រោងនឹងឡើងដឹកនាំសេតវិមានបន្តពីលោក អូបាម៉ា។
ការចោទប្រកាន់ថារុស្ស៊ីបានចូលលុកលុយក្នុងការបោះឆ្នោតជ្រើសរើសប្រធានាធិបតីអាមេរិកកាលពីខែវិច្ឆិកាកន្លងមកនោះ បានជំរុញឲ្យលោក អូបាម៉ា ផ្ទុះកំហឹង ហើយបណ្ដេញអ្នកកាទូតរុស្ស៊ីចេញ និងដាក់ទណ្ឌកម្មផ្សេងទៀត៕
