របាយការណ៍អគ្គស្នងការនគរបាលជាតិ បានបង្ហាញថា តួលេខគ្រោះថ្នាក់ចរាចរណ៍ បានកើនឡើង ៧ភាគរយនៅក្នុងខែធ្នូកន្លងមកនេះ បើទោះបីជាចំនួនអ្នកស្លាប់ក្នុងគ្រោះថ្នាក់ចរាចរណ៍ទូទាំងប្រទេសកម្ពុជា បានថយចុះក៏ដោយ។
របាយការណ៍គ្រោះថ្នាក់ចរាចរណ៍ចេញផ្សាយដោយអគ្គស្នងការនគរបាលជាតិកម្ពុជា នៅថ្ងៃនេះ បានបង្ហាញថា គិតចាប់ពីថ្ងៃទី០១ ដល់ថ្ងៃទី៣១ ខែធ្នូនេះ គ្រោះថ្នាក់ចរាចរណ៍ បានកើតឡើង ៣៦២លើកនៅទូទាំងប្រទេស ដោយបានសម្លាប់មនុស្ស ១៤១នាក់ និងបណ្ដាលឲ្យមនុស្ស ៦៤៥នាក់ផ្សេងទៀត រងរបួស។
របាយការណ៍ដដែលនេះបង្ហាញថា ចំនួនគ្រោះថ្នាក់ចរាចរណ៍រយៈពេលមួយខែកន្លងមកនេះ បានកើនឡើង ៧ភាគរយ បើធៀបនឹងខែវិច្ឆិកាកន្លងមក ដែលមានត្រឹមតែ ៣៣៧លើកតែប៉ុណ្ណោះ។ ប៉ុន្តែ តួលេខអ្នកស្លាប់ បានថយចុះ ៧ភាគរយ ខណៈចំនួនអ្នករងរបួស បានកើនឡើង ៦ភាគរយ៕