សេចក្ដីរាយការណ៍របស់អគ្គស្នងការនគរបាលជាតិកម្ពុជា ឲ្យដឹងថា បទល្មើសនេសាទជាង ៣០០ករណី ត្រូវបានសមត្ថកិច្ចបង្ក្រាបបាននៅក្នុងរយៈពេលមួយខែដើមឆ្នាំ២០១៧នេះ។ នេះដោយផ្អែកតាមការចុះផ្សាយរបស់វេបសាយរបស់អគ្គស្នងការនគរបាលជាតិកម្ពុជា ដែលបានដកស្រង់សម្ដីអ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ កាលពីថ្ងៃម្សិលមិញនេះ។
ថ្លែងនៅក្រោយកិច្ចប្រជុំគណៈកម្មការបង្ក្រាបបទល្មើសនេសាទខុសច្បាប់នៅបឹងទន្លេសាប កាលពីថ្ងៃម្សិលមិញនេះ អ្នកនាំពាក្យរូបនេះ បានឲ្យដឹងថា គិតចាប់ពីដើមខែធ្នូឆ្នាំមុន រហូតដល់ចុងខែមករានេះ សមត្ថកិច្ចបង្ក្រាបបានបទល្មើសនេសាទសរុប ៣២៩ករណី ក្នុងនោះ ៨ករណីត្រូវបានបញ្ជូនទៅតុលាការ។
អ្នកនាំពាក្យរូបនេះ អះអាងថា បទល្មើសនេសាទនៅបឹងទន្លេសាបបានថយចុះ បន្ទាប់ពីគណៈកម្មការបង្ក្រាបបទល្មើសនេសាទនៅបឹងទន្លេសាប ត្រូវបានបង្កើតឡើង កាលពីចុងខែធ្នូឆ្នាំមុន៕
