របាយការណ៍នគរបាលជាតិកម្ពុជា បានបង្ហាញថា យ៉ាងហោចណាស់មនុស្ស ១១នាក់ បានស្លាប់ ហើយ ៣៨នាក់ទៀតបានរងរបួសធ្ងន់ និងស្រាល នៅក្នុងគ្រោះថ្នាក់ចរាចរណ៍ ដែលបានកើតឡើងកាលពីថ្ងៃម្សិលមិញនេះ ចំថ្ងៃទីពីរនៃពិធីបុណ្យចូលឆ្នាំចិន។
របាយការណ៍នគរបាលជាតិកម្ពុជា ដែលត្រូវបានចុះផ្សាយលើវេបសាយអគ្គស្នងការនគរបាលជាតិកម្ពុជា បានឲ្យដឹងថា គ្រោះថ្នាក់ចរាចរណ៍ចំនួន ២២ករណី បានកើតឡើងនៅចន្លោះថ្ងៃទី២៧ ដល់ថ្ងៃទី២៨ ខែមករានេះ ដោយបានសម្លាប់មនុស្ស ១១នាក់ ខណៈមនុស្ស ២៣នាក់ទៀតរងរបួសធ្ងន់ ហើយ ១៥នាក់ទៀតរងរបួសស្រាល។
នៅអំឡុងពិធីបុណ្យចូលឆ្នាំចិនរយៈពេល ២ថ្ងៃមកនេះ នគរបាលកម្ពុជា បានរាយការណ៍ថា គ្រោះថ្នាក់ចរាចរណ៍សរុប ៣៨ករណី បានកើតឡើងនៅទូទាំងប្រទេស ដោយបានសម្លាប់មនុស្សដល់ទៅ ២២នាក់ ហើយមនុស្ស ៦០នាក់ទៀតបានរងរបួស៕