សាច់ញាតិនៃអ្នកដំណើរជនជាតិហូឡង់ ដែលបានស្លាប់នៅពេលយន្តហោះ MH17 ត្រូវបានគេបាញ់ទម្លាក់នៅលើប្រទេសអ៊ុយក្រែនកាលពីពាក់កណ្ដាលឆ្នាំ២០១៤នោះ នៅថ្ងៃនេះ បានដាំដើមឈើដំបូងគេ នៅក្នុងឧទ្យានរំលឹកអនុស្សាវរីយ៍មួយ នៅមិនឆ្ងាយប៉ុន្មានពីទីតាំងដែលយន្តហោះនោះហោះហើរចេញដំណើរនោះឡើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ប្រធានមូលនិធិជនរងគ្រោះយន្តហោះ MH17 លោក Evert van Zijtveld បានប្រាប់ថា ថ្ងៃនេះគឺជាថ្ងៃសំខាន់ណាស់សម្រាប់សាច់ញាតិជំនាន់ក្រោយ។ លោកបន្ថែមថា ពួកលោកដាំដើមឈើដើម្បីបង្កើតជាស្តូបមួយសម្រាប់យន្តហោះ MH17 នោះ។
លោកបន្តថា ពួកលោកដាំដើមឈើដើម្បីធានាថា អនុស្សាវរីយ៍របស់ពួកគេ នឹងត្រូវគេចងចាំ និងរំលឹកថា ពួកលោកចង់បានយុត្តិធម៌សម្រាប់ជនរងគ្រោះ។
យន្តហោះ MH17 របស់ក្រុមហ៊ុនអាកាសចរណ៍ម៉ាឡេស៊ី ត្រូវបានគេបាញ់ទម្លាក់នៅភាគខាងកើតប្រទេសអ៊ុយក្រែន កាលពីថ្ងៃទី១៧ ខែកក្កដា ឆ្នាំ២០១៤ អំឡុងពេលវាហោះហើរពីទីក្រុងអាំស្ទែដាម ទៅកាន់ទីក្រុងគួឡាឡំពួរ ដោយបានសម្លាប់មនុស្សទាំង ២៩៨នាក់ នៅលើយន្តហោះនោះ ដោយភាគច្រើនជាជនជាតិហូឡង់៕