រដ្ឋាភិបាលវៀតណាម បានអះអាងថា ប្រធានាធិបតីអាមេរិក លោក ដូណាល់ ត្រាំ បានផ្ញើលិខិតទៅប្រធានាធិបតីវៀតណាម លោក ត្រាន់ ដាយហ្គ័ង ដើម្បីជំរុញកិច្ចសហប្រតិបត្តិការរវាងប្រទេសទាំងពីរ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
វៀតណាម និងសហរដ្ឋអាមេរិក បានកែលម្អទំនាក់ទំនងរបស់ពួកគេឈានដល់កម្រិតថ្មីមួយទៀត នៅក្រោមរដ្ឋបាលលោក អូបាម៉ា ចំពេលដែលក្រុងហាណូយមានជម្លោះជាមួយចិន ជុំវិញបញ្ហាសមុទ្រចិនខាងត្បូង។ ចំណែកឯលោក ត្រាំ ក៏បានបង្ហាញក្ដីសង្ឃឹមចង់បានទំនាក់ទំនងកាន់តែរឹងមាំថែមទៀតផងដែរ។
វេបសាយរដ្ឋាភិបាលវៀតណាម បាននិយាយថា លោក ត្រាំ បានផ្ញើលិខិតមួយច្បាប់ទៅលោក ត្រាំ ដាយហ្គ័ង ដោយបានបញ្ជាក់ពីបំណងរបស់លោក ក្នុងការជំរុញកិច្ចសហប្រតិបត្តិការខាងផ្នែកសេដ្ឋកិច្ច ពាណិជ្ជកម្ម និងបញ្ហាតំបន់ និងអន្តរជាតិ។
មេដឹកនាំវៀតណាម បានលើកឡើងដូច្នេះ អំឡុងពេលជួបពិភាក្សាជាមួយអគ្គរដ្ឋទូតអាមេរិកប្រចាំវៀតណាមកាលពីថ្ងៃម្សិលមិញនេះ។
លោក ហ្គ័ង បានសង្កត់ធ្ងន់ថា វៀតណាមស្វាគមន៍កិច្ចខិតខំប្រឹងប្រែងរបស់អាមេរិក ក្នុងការស្ដារកិច្ចសហប្រតិបត្តិការជាមួយបណ្ដាប្រទេសនៅក្នុងតំបន់ ដើម្បីរក្សាសេរីភាពខាងនាវាចរណ៍ និងអាកាសចរណ៍៕
