យ៉ាងហោចណាស់មនុស្សម្នាក់ បានស្លាប់ និង ២៨នាក់ទៀត ត្រូវបានគេជឿថា កប់នៅក្រោមដី កាលពីថ្ងៃម្សិលមិញនេះ បន្ទាប់ពីគ្រោះថ្នាក់រអិលបាក់ដីមួយ បានវាយប្រហារទៅលើភូមិមួយ ស្ថិតនៅកោះជ្វាខាងកើត ក្នុងប្រទេសឥណ្ឌូនេស៊ី។ នេះដោយយោងតាមការចុះផ្សាយរបស់សារព័ត៌មាន Channel News Asia ដែលបានដកស្រង់សម្ដីទីភ្នាក់ងារគ្រោះមហន្តរាយជាតិឥណ្ឌូនេស៊ី។
ផ្ទាំងដីភក់ដ៏ធំមួយ បានរអិលធ្លាក់ទៅលើផ្ទះរបស់ប្រជាជន ក្រោយពីមានភ្លៀងធ្លាក់ខ្លាំងក្លា ដោយបណ្ដាលឲ្យខូចខាតផ្ទះសម្បែងជាច្រើន នៅក្នុងស្រុកប៉ូណូរ៉ូហ្កូ។
អ្នកនាំពាក្យទីភ្នាក់ងារគ្រប់គ្រងគ្រោះមហន្តរាយឥណ្ឌូនេស៊ី លោក ស៊ូតូផូ ព័រវ៉ូ បានឲ្យដឹងថា មនុស្ស ១៧នាក់ បានរងរបួស និងត្រូវបានបញ្ជូនទៅព្យាបាលនៅឯមន្ទីរពេទ្យមួយនៅក្នុងតំបន់ ខណៈដែលទាហាន ប៉ូលិស និងកម្លាំងស្ម័គ្រចិត្ត កំពុងស្វែងរកមនុស្សកំពុងបាត់ខ្លួន។
លោក ស៊ូតូផូ បានបន្ថែមថា អាជ្ញាធរកំពុងស្វែងរកមនុស្ស ២៨នាក់ទៀតដែលកំពុងបាត់ខ្លួន ប៉ុន្តែ ប្រតិបត្តិការស្វែងរកនោះ បានផ្អាកទៅវិញ ដោយសារអាកាសធាតុមិនល្អ។
ប្រជាជនជាច្រើន បានភៀសខ្លួនចេញពីភូមិនោះ ក្រោយពីទទួលបានសារព្រមានអំពីគ្រោះថ្នាក់រអិលបាក់ដីពីអាជ្ញាធរ ប៉ុន្តែ ប្រជាជនជាច្រើន បានវិលត្រឡប់ទៅភូមិនោះវិញ នៅព្រឹកថ្ងៃអាទិត្យនេះ។
គ្រោះថ្នាក់រអិលបាក់ដី បានកើតឡើងជាញឹកញាប់នៅប្រទេសឥណ្ឌូនេស៊ី។ កាលពីខែកុម្ភៈកន្លងមកនេះ មនុស្ស ១២នាក់ រួមទាំងកូនក្មេង ៣នាក់ផង បានស្លាប់នៅក្នុងគ្រោះថ្នាក់រអិលបាក់ដី នៅលើកោះបាលី។ កាលពីខែកញ្ញាឆ្នាំមុន មនុស្សជិត ៣០នាក់ បានស្លាប់នៅក្នុងគ្រោះទឹកជំនន់ និងការរអិលបាក់ដី នៅភាគខាងលិចកោះជ្វា៕