ប្រមុខរដ្ឋាភិបាលបានអំពាវនាវដល់វិស័យឯកជន ដៃគូអភិវឌ្ឍន៍ និងសង្គមស៊ីវិល ចូលរួមសហការជាមួយរដ្ឋាភិបាល ដើម្បីជួយជនរងគ្រោះដោយមហន្តរាយធម្មជាតិ ខណៈមន្ត្រីសង្គមស៊ីវិលបង្ហាញការស្វាគមន៍។
ការអំពាវនាវរបស់លោកនាយករដ្ឋមន្ត្រី ហ៊ុន សែន ធ្វើឡើងតាមរយៈសារអបអរសាទរនៅក្នុង «ទិវាជាតិគ្រប់គ្រងគ្រោះមហន្តរាយ» នៅថ្ងៃទី១៣ ខែតុលា ឆ្នាំ២០២១នេះ ក្រោមប្រធានបទ «បង្កើនការត្រៀមបង្ការហានិភ័យគ្រោះមហន្តរាយ ដើម្បីភូមិ-ឃុំមានសុវត្ថិភាព និងភាពធន់»។
លោកនាយករដ្ឋមន្ត្រី ហ៊ុន សែន បានលើកឡើងថា ដើម្បីធានានូវភាពជោគជ័យនៃការកាត់បន្ថយហានិភ័យគ្រោះមហន្តរាយ គឺត្រូវប្រកាន់ខ្ជាប់ជារៀងរហូតនូវវប្បធម៌ចែករំលែក ដោយឈរលើស្មារតីជួយគ្នាទៅវិញទៅមក សហការឱ្យកាន់តែរឹងមាំថែមទៀតជាមួយរាជរដ្ឋាភិបាលក្នុងការអភិវឌ្ឍសង្គមជាតិ និងជួយរំលែកទុក្ខលំបាកប្រជាជនដែលងាយរងគ្រោះនៅទូទាំងប្រទេស។
សាររបស់លោកបន្តថា៖ «ខ្ញុំសូមយកឱកាសនៃទិវាជាតិគ្រប់គ្រងគ្រោះមហន្តរាយ ១៣ តុលា ២០២១ នេះ ធ្វើការអំពាវនាវវិស័យឯកជន ដៃគូរអភិវឌ្ឍន៍ សង្គមស៊ីវិល បន្តចូលរួមសហប្រតិបត្តិការ កៀរគរធនធានដែលចាំបាច់ ដើម្បីធានាអនុវត្តការកាត់បន្ថយហានិភ័យគ្រោះមហន្តរាយឱ្យមានប្រសិទ្ធភាព សម្រាប់ភាពធន់ទៅនឹងការប្រែប្រួលអាកាសធាតុ»។
តាមរយៈសារលិខិតដដែលនោះ លោកនាយករដ្ឋមន្ត្រីក៏បានអំពាវនាវឱ្យក្រសួងស្ថាប័នថ្នាក់ជាតិនិងថ្នាក់ក្រោមជាតិ ត្រូវពង្រឹងយន្តការគ្រប់គ្រងគ្រោះមហន្តរាយ ដោយផ្ដោតសំខាន់លើការត្រៀមបង្ការហានិភ័យដើម្បីកាត់បន្ថយគ្រោះមហន្តរាយ ដោយត្រៀមរៀបចំសម្រាប់ការឆ្លើយតបទៅនឹងមុខសញ្ញាគ្រោះថ្នាក់ផ្សេងៗពាក់ព័ន្ធនឹងការប្រែប្រួលអាកាសធាតុ ជាពិសេសជួយដល់ប្រជាជនក្រីក្រ ជនងាយរងគ្រោះ ស្ត្រី កុមារ ចាស់ជរា និងជនមានពិការភាព ជាដើម។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា ការអំពាវនាវរបស់ប្រមុខរដ្ឋាភិបាលជារឿងវិជ្ជមាន ហើយរូបភាពនេះបង្កើតនូវបរិយាកាសគណនេយ្យភាពទៅវិញទៅមក ដើម្បីរួមគ្នាបង្ការនូវផលប៉ះពាល់ដែលកើតឡើងដោយគ្រោះធម្មជាតិ។
លោកថា គ្រោះមហន្តរាយជាផ្នែកមួយនៃវិបត្តិពិភពលោកទាក់ទងនឹងបម្រែបម្រួលអាកាសធាតុ ដូច្នេះការដោះស្រាយបញ្ហានេះចាំបាច់ត្រូវមានការសហការមិនថាកម្រិតពិភពលោកនិងកម្រិតប្រទេសនោះទេ។
បើតាមលោក សន ជ័យ ការចាត់វិធានការបង្ការធ្វើឱ្យមានភាពរឹងមាំដល់ប្រជាពលរដ្ឋ ត្រូវមើលលើ៣ចំណុចសំខាន់ៗដូចជា ការកាត់បន្ថយការកាប់បំផ្លាញព្រៃឈើ (ការអភិរក្សនូវជីវចម្រុះ ហើយធាតុផ្សំផ្សេងៗ) ការសហការរវាងរដ្ឋ-ឯកជន-សង្គមស៊ីវិល និងលំហនៃកិច្ចការសហការរួមគ្នា រវាងអាជ្ញាធរជាមួយប្រជាពលរដ្ឋ ពិសេសផ្ដល់ឱកាសឱ្យក្រុមយុវជនចូលរួមសកម្មភាពការពារធនធានធម្មជាតិ។
លោក សន ជ័យ មានប្រសាសន៍បន្តថា៖ «ក្រៅតែពីការដែល [សហការដើម្បី] កៀរគរធនធាន ហើយនិងការស្វែងរកការគាំទ្រ គឺ [ត្រូវមាន] ការសហការគ្នារវាងរដ្ឋាភិបាល វិស័យឯកជន ហើយនិងសង្គមស៊ីវិល នៅក្នុងការទប់ស្កាត់ឬក៏ជំរុញឱ្យមានការអនុវត្តច្បាប់ចំពោះបទល្មើសព្រៃឈើ បទល្មើសបំផ្លាញជីវចម្រុះផ្សេងៗហ្នឹង ដើម្បីធានាថា អនុសាសន៍របស់ពិភពលោកមកបណ្ដាប្រទេសមួយចំនួនដែលមានការពាក់ព័ន្ធជាមួយនឹងការកាប់បំផ្លាញព្រៃឈើជាដើមហ្នឹង នឹងត្រូវបានយកមកអនុវត្តឱ្យបានគ្រប់ជ្រុងជ្រោយ»។
ចំណែកប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ក៏បានថ្លែងគាំទ្រចំពោះការអំពាវនាវរបស់រដ្ឋាភិបាលនេះដែរ។ តែយ៉ាងណា លោកថា រដ្ឋាភិបាលនៅតែជាផ្នែកមួយសំខាន់ក្នុងការទទួលខុសត្រូវចំពោះបញ្ហាគ្រោះមហន្តរាយ ព្រោះវិស័យឯកជននិងសង្គមស៊ីវិលជួយកៀរគរធនធានដើម្បីជួយកម្ពុជាបានត្រឹមកម្រិតមួយតែប៉ុណ្ណោះ។
លោកបន្តថា៖ «ការចូលរួមរបស់ប្រជាពលរដ្ឋ សង្គមស៊ីវិល ក៏ដូចជាវិស័យឯកជន នឹងមានភាពសស្រាក់សស្រាំដោយស្មោះស្ម័គ្រអស់ពីចិត្ត លុះត្រាណាតែស្ថាប័នរដ្ឋកែលម្អឱ្យកាន់តែប្រសើរនូវអភិបាលកិច្ចល្អ ក៏ដូចជាការធ្វើឱ្យមានតម្លាភាព ការប្រយុទ្ធប្រឆាំងនឹងអំពើពុករលួយឱ្យបានកាន់តែល្អប្រសើរ នោះវិស័យឯកជន សង្គមស៊ីវិល ពលរដ្ឋ នឹងចូលរួមជួយបំពេញចន្លោះខ្វះខាត»។
គ្រោះមហន្តរាយដោយទឹកជំនន់កាលពីខែតុលា ឆ្នាំ២០២០ បានបណ្ដាលឱ្យមនុស្ស២៥នាក់ស្លាប់ និងប្រជាជនសរុបជាង៣០០ ០០០នាក់ ក្នុងរាជធានី-ខេត្តចំនួន១៩នៅទូទាំងប្រទេសកម្ពុជា បានទទួលរងផលប៉ះពាល់។
តាមរយៈសារអបអរសាទរ «ទិវាជាតិគ្រប់គ្រងគ្រោះមហន្តរាយ» ថ្ងៃទី១៣ ខែតុលានេះ លោក នាយករដ្ឋមន្ត្រី ហ៊ុន សែន ក៏បានសំណូមពរឱ្យប្រព័ន្ធផ្សព្វផ្សាយ សារព័ត៌មានរបស់រដ្ឋនិងឯកជន ជួយផ្សព្វផ្សាយឱ្យបានទូលំទូលាយនូវព័ត៌មានព្យាករណ៍អាកាសធាតុ កំណើនទឹកទន្លេ ស្ទឹង ព្រែក មុខសញ្ញាគ្រោះថ្នាក់ផ្សេងៗ និងសារអប់រំការយល់ដឹងជាសាធារណៈពីវិធានការដើម្បីបញ្ចៀសគ្រោះមហន្តរាយជូនសាធារណជនជ្រាបទាន់ពេលវេលានិងឆាប់រហ័សថែមទៀងផង៕