ក្រសួងការបរទេសកូរ៉េខាងត្បូង បានឲ្យដឹងថា នាវាដឹកជញ្ជូនរបស់កូរ៉េខាងត្បូងមួយគ្រឿង រួមទាំងសមាជិកនាវិក ២២នាក់ កំពុងបាត់ខ្លួន ក្រោយពីវាបាត់ការទាក់ទងគ្នានៅមហាសមុទ្រអាត្លង់ទិចខាងត្បូង នៅចម្ងាយ ២៥០០គីឡូម៉ែត្រពីឆ្នេរសមុទ្រ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ទីភ្នាក់ងារព័ត៌មានយ៉ុនហាប់របស់កូរ៉េខាងត្បូង បានផ្សាយថា សមាជិកនាវិកជាជនជាតិហ្វីលីពីន ២នាក់ ត្រូវបានគេជួយសង្គ្រោះកាលពីថ្ងៃម្សិលមិញនេះ ក្រោយពីបណ្ដែតខ្លួនលើពោងខ្យល់ ប៉ុន្តែ ពោងខ្យល់ដទៃទៀត ត្រូវបានគេរកឃើញដោយមិនមានមនុស្សនោះឡើយ។
មន្ត្រីការបរទេសម្នាក់ បានឲ្យដឹងថា ប្រតិបត្តិការស្វែងរកមួយ កំពុងតែធ្វើឡើងដើម្បីស្វែងរកមនុស្ស ២២នាក់ ដែលក្នុងនោះមានពលរដ្ឋកូរ៉េខាងត្បូង ៨នាក់ និងជនជាតិហ្វីលីពីន ១៤នាក់។
កូរ៉េខាងត្បូង បានស្នើទៅប្រទេសប្រេស៊ីល និងអ៊ុយរូហ្កាយ ឲ្យផ្ដល់ជំនួយក្នុងការស្វែងរក និងជួយសង្គ្រោះក្រុមនាវិកទាំងនោះ។
នាវា Stellar Daisy ដែលប្រតិបត្តិការដោយក្រុមហ៊ុន Polaris Shipping របស់កូរ៉េខាងត្បូងនោះ ស្ថិតក្នុងដំណើរដឹករ៉ែដែកពីប្រទេសប្រេស៊ីល ទៅកាន់ប្រទេសចិន នៅពេលវាផ្ដល់សញ្ញាទៅដល់បញ្ជាការនាវាដឹកជញ្ជូនកាលពីថ្ងៃសុក្រកន្លងមកនេះ៕
