ប៉ូលិសប្រទេសស៊ុយអ៊ែត កំពុងប្រតិបត្តិការស្វែងរកអ្នកបើកបររថយន្តធុនធំម្នាក់ ដែលបានបើកបំបុកក្រុមមនុស្សកកកុញ នៅខាងក្រៅហាងលក់ទំនិញដ៏មមាញឹកមួយ នៅកណ្ដាលទីក្រុងស្តុកខុម កាលពីថ្ងៃម្សិលមិញនេះ ដោយបានសម្លាប់មនុស្ស ៤នាក់ និងបង្កឲ្យមនុស្ស ១៥នាក់ទៀតរងរបួស។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
មេប៉ូលិសជាតិស៊ុយអ៊ែត លោក Stefan Hector បាននិយាយថា សម្មតិកម្មដំបូងរបស់ប៉ូលិសគឺថា នោះគឺជាការវាយប្រហារភេរវកម្ម។
ប៉ូលិសបាននិយាយថា បុរសម្នាក់ ត្រូវបានគេចាប់ខ្លួនពាក់ព័ន្ធនឹងការវាយប្រហារនោះ ប៉ុន្តែ អ្នកបើកបរម្នាក់ កំពុងរត់គេចខ្លួននៅឡើយ។
នាយករដ្ឋមន្ត្រីស៊ុយអ៊ែត លោក Stefan Lofven បាននិយាយថា លោកបានពង្រឹងការគ្រប់គ្រងព្រំដែនរបស់ប្រទេសនេះ។
ប្រសិនបើការវាយប្រហារនេះត្រូវបានគេបញ្ជាក់ថា ជាអំពើភេរវកម្មនោះ វានឹងក្លាយទៅជាការវាយប្រហារដ៏បង្ហូរឈាមលើកដំបូងនៅក្នុងប្រទេសស៊ុយអ៊ែត៕