ប៉ូលិស បាននិយាយថា បុរសមូស្លីមម្នាក់ ត្រូវបានគេវាយរហូតដល់ស្លាប់ ដោយសារតែទាក់ទងស្នេហាជាមួយនារីហិណ្ឌូម្នាក់ នៅក្នុងប្រទេសឥណ្ឌា ដែលនេះគឺជាអំពើហិង្សាបង្កឡើងដោយក្រុមមនុស្សប្រឆាំងនឹងជនជាតិភាគតិចនៅក្នុងប្រទេសមួយនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
យុវជន មូហាំម៉េដ ហ្សាលីក អាយុ ២០ឆ្នាំ ត្រូវបានមនុស្សរាប់សិបនាក់វាយដុំ នៅក្នុងសង្កាត់មួយ បន្ទាប់ពីគេបានឃើញយុវជនរូបនេះ បានដឹកមិត្តស្រីរបស់ខ្លួន ទៅទម្លាក់នៅជិតផ្ទះនាង ស្ថិតនៅក្នុងសង្កាត់ Gumla ភាគខាងកើតរដ្ឋចាខាន់។
ប៉ូលិស បាននិយាយថា ក្រុមមនុស្សបានចងយុវជនរូបនេះនៅចំពោះមុខមិត្តស្រីរបស់គេ និងបានវាយដុំដោយដំបង និងខ្សែក្រវ៉ាត់ អស់រយៈពេលប៉ុន្មានម៉ោង កាលពីល្ងាចថ្ងៃពុធកន្លងមក។ ប៉ូលិសបន្ថែមថា យុវជនរូបនោះ បានបាត់បង់ជីវិតទៅហើយកាលពីថ្ងៃព្រហស្បតិ៍ ដោយសារតែរបួសគ្រាំគ្រាពេក។
មេប៉ូលិសទីក្រុង Gumla បាននិយាយថា ប៉ូលិសកំពុងស្រាវជ្រាវថា តើក្រុមមនុស្សទាំងនោះត្រូវបានគ្រួសារខាងស្រីពន្យុះមែនឬយ៉ាងណា។ ប៉ូលិសបន្ថែមថា មនុស្ស ៣នាក់ ត្រូវបានគេចាប់ខ្លួន ហើយអ្នកដទៃទៀតស្ថិតនៅក្រោមការតាមចាប់ខ្លួនចំពោះការសម្លាប់មនុស្សនេះ៕