ទាយាទនៃសម្ព័ន្ធក្រុមហ៊ុន Samsung បានបង្ហាញខ្លួននៅតុលាការកាលពីថ្ងៃម្សិលមិញ សម្រាប់ការចាប់ផ្ដើមសវនការទៅលើសំណុំរឿងបោកបញ្ឆោត ពាក់ព័ន្ធនឹងរឿងអាស្រូវនយោបាយ ដែលបានទាញអ្នកស្រី ផាក ហ្គឹនហេ ឲ្យធ្លាក់ចេញពីតំណែង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក លី ជែយ៉ុង នាយករងក្រុមហ៊ុន Samsung Electronics ត្រូវបានគេនាំឡើងតុលាការមួយស្ថិតនៅកណ្ដាលទីក្រុងសេអ៊ូល ជាមួយដៃជាប់ខ្នោះ។
លោក លី ដែលត្រូវបានសមត្ថកិច្ចចាប់ខ្លួនកាលពីខែកុម្ភៈនោះ ត្រូវបានតុលាការចោទប្រកាន់ពីបទផ្ដល់ប្រាក់ជិត ៤០លានដុល្លារ ទៅដល់អ្នកស្រី ផាក ហ្គឹនហេ និងមិត្តភក្តិជិតដិតអ្នកស្រី ផាក គឺអ្នកស្រី ឆយ ស៊ុនស៊ីល ជាសំណូកមួយដើម្បីគាំទ្រគោលនយោបាយ។
ចំណែកឯនាយកប្រតិបត្តិ ៤រូបទៀតរបស់ក្រុមហ៊ុន Samsung ក៏ត្រូវបានតុលការចោទប្រកាន់ផងដែរ។
រដ្ឋអាជ្ញាពិសេស លោក ផាក យ៉ុងស៊ូ និយាយនៅពេលបើកសវនការថា សំណុំរឿងលោក លី គឺជាករណីមួយមានឫស្សគល់ជ្រៅ ពាក់ព័ន្ធនឹងទំនាក់ទំនងមិនល្អរវាងក្រុមអ្នកនយោបាយ និងក្រុមអ្នកជំនួញ។
ប្រធានាធិបតីអស់អំណាច អ្នកស្រី ផាក ត្រូវបានសមត្ថកិច្ចចាប់ដាក់ឃុំកាលពីសប្ដាហ៍មុន បន្ទាប់ពីតុលាការបញ្ជាឲ្យចាប់ខ្លួនអ្នកស្រី ពាក់ព័ន្ធនឹងរឿងអាស្រូវពុករលួយ៕
