នាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ នៅថ្ងៃនេះ បានកោតសរសើរទៅដល់ “ការប្ដេជ្ញាចិត្តដ៏រឹងមាំ”របស់ប្រធានាធិបតីអាមេរិក លោក ដូណាល់ ត្រាំ ចំពោះបញ្ហាសន្តិសុខពិភពលោក និងសន្តិសុខរបស់ប្រទេសសម្ព័ន្ធមិត្ត ក្រោយពីលោក និងមេដឹកនាំអាមេរិកបានអំពាវនាវពីរលើករួចមកហើយទៅដល់កូរ៉េខាងជើង នៅក្នុងរយៈពេល ៤ថ្ងៃចុងក្រោយមកនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
លោក អាបេ បានប្រាប់ក្រុមអ្នកយកព័ត៌មានថា មេដឹកនាំទាំងពីរបានឯកភាពថា អាមេរិក ជប៉ុន និងកូរ៉េខាងត្បូង នឹងរក្សាទំនាក់ទំនងជិតស្និទ្ធនឹងគ្នាជុំវិញបញ្ហាកូរ៉េខាងជើង ហើយពួកគេបានឯកភាពថានឹងឃ្លាំមើលប្រតិកម្មរបស់ចិន ទៅនឹងកម្មវិធីអភិវឌ្ឍន៍គ្រាប់មីស៊ីល និងនុយក្លេអ៊ែររបស់ក្រុងព្យុងយ៉ាង។
ក្នុងសេចក្ដីអំពាវនាវមួយកាលពីថ្ងៃព្រហស្បតិ៍កន្លងមក ឬមួយថ្ងៃក្រោយពីកូរ៉េខាងជើងបានបាញ់សាកល្បងគ្រាប់មីស៊ីលថ្មីមួយទៀតនោះ លោក អាបេ បាននិយាយថា រូបលោក និងលោក ត្រាំ បានឯកភាពថា ការបាញ់គ្រាប់មីស៊ីលនោះ គឺជាសកម្មភាពបង្កហេតុដ៏គ្រោះថ្នាក់ និងជាការគំរាមកំហែងធ្ងន់ធ្ងរ។
លោក អាបេ កាលពីថ្ងៃសុក្រកន្លងមក ក៏បានសម្ដែងការគាំទ្រចំពោះលោក ត្រាំ ផងដែរ ដែលបានបញ្ជាឲ្យវាយប្រហារទៅលើប្រទេសស៊ីរី ក្រោយពីក្រុងដាម៉ាស់ប្រើប្រាស់អាវុធគីមីវាយប្រហារលើតំបន់កាន់កាប់ដោយពួកឧទ្ទាមនៅក្នុងសប្ដាហ៍នេះ៕
