កូរ៉េខាងជើង កាលពីថ្ងៃម្សិលមិញណេះ បាននិយាយថា ការវាយប្រហារដោយគ្រាប់មីស៊ីលរបស់អាមេរិកទៅលើមូលដ្ឋានទ័ពអាកាសស៊ីរីកាលពីថ្ងៃសុក្រកន្លងមក គឺជាទង្វើឈ្លានពានមិនអាចលើកលែងឲ្យបាន ដែលបង្ហាញបានថា ការសម្រេចចិត្តរបស់ខ្លួនក្នុងការអភិវឌ្ឍអាវុធនុយក្លេអ៊ែរ គឺជាជម្រើសដ៏ត្រឹមត្រូវ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
នេះគឺជាប្រតិកម្មជាលើកដំបូងរបស់ក្រសួងការបរទេសកូរ៉េខាងជើង បន្ទាប់ពីនាវាចម្បាំងអាមេរិកនៅសមុទ្រមេឌីទែរ៉ាណេ បានបាញ់គ្រាប់មីស៊ីលរាប់សិបគ្រាប់ទៅលើមូលដ្ឋានកងទ័ពស៊ីរី ដែលមន្ទីរបញ្ចកោណអាមេរិកនិយាយថា ស៊ីរីជាប់ពាក់ព័ន្ធនឹងការវាយប្រហារដោយអាវុធគីមីទៅលើជនស៊ីវិលនៅដើមសប្ដាហ៍នេះ។
ប្រព័ន្ធផ្សព្វផ្សាយកូរ៉េខាងជើង បានដកស្រង់សម្ដីអ្នកនាំពាក្យម្នាក់នៅក្រសួងការបរទេសកូរ៉េខាងជើង ដែលបាននិយាយថា ការវាយប្រហាររបស់អាមេរិកទៅលើប្រទេសស៊ីរី គឺជាទង្វើឈ្លានពានយ៉ាងច្បាស់ និងមិនអាចអត់ឱនឲ្យបាន ប្រឆាំងនឹងអធិបតេយ្យភាពរបស់រដ្ឋមួយ ហើយក្រុងព្យុងយ៉ាងថ្កោលទោសយ៉ាងខ្លាំងចំពោះការវាយប្រហារនេះ។
ក្រុងព្យុងយ៉ាងបន្តថា ការវាយប្រហាររបស់អាមេរិក បង្ហាញថា ការសម្រេចចិត្តរបស់ខ្លួនក្នុងការពង្រឹងអំណាចយោធាដើម្បីប្រឆាំងនឹងកម្លាំងបរទេស គឺជាជម្រើសត្រឹមត្រូវ។
រដ្ឋឯកោកូរ៉េខាងជើង បានចាត់ទុកស៊ីរីជាសម្ព័ន្ធមិត្តសំខាន់របស់ខ្លួន។ ប្រព័ន្ធផ្សព្វផ្សាយកូរ៉េខាងជើង បាននិយាយថា មេដឹកនាំក្រុងព្យុងយ៉ាង លោក គីម ជុងអ៊ុន និងប្រធានាធិបតីស៊ីរី លោក បាសារ អាល់អាសាដ បានផ្ញើសារជូនពរគ្នាទៅវិញទៅមក និងការប្ដេជ្ញាចិត្តចំពោះមិត្តភាព និងកិច្ចសហប្រតិបត្តិការរវាងប្រទេសទាំងពីរ៕