មន្ត្រីអាមេរិកម្នាក់ បានឲ្យដឹងថា កងកម្លាំងវាយប្រហារមួយក្រុមមកពីកងទ័ពជើងទឹកអាមេរិក នឹងចល័តទៅមហាសមុទ្រប៉ាស៊ីហ្វិកខាងលិច ទៅជិតនឹងឧបទ្វីបកូរ៉េ ខណៈដែលមានក្ដីបារម្ភកាន់តែខ្លាំងអំពីកម្មវិធីផលិតអាវុធរបស់កូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
នៅដើមខែមេសានេះ កូរ៉េខាងជើងបានបាញ់សាកល្បងមីស៊ីលមួយគ្រាប់ ដែលអាចហោះហើរបានចម្ងាយខ្លីតែប៉ុណ្ណោះ។
មន្ត្រីអាមេរិកម្នាក់ ដែលស្នើសុំលាក់ឈ្មោះនោះ បាននិយាយថា ក្រុមវាយប្រហារឈ្មោះ Carl Vinson មាននាវាផ្ទុកយន្តហោះមួយគ្រឿង នឹងតម្រង់ទិសដៅរបស់ខ្លួនទៅកាន់ឧបទ្វីបកូរ៉េ។
នៅឆ្នាំនេះ មេដឹកនាំកូរ៉េខាងជើង លោក គីម ជុងអ៊ុន បានបញ្ជាក់ដដែលៗអំពីការសាកល្បងគ្រាប់មីស៊ីល ពោលគឺអាចបាញ់សាកល្បងជាថ្មីម្ដងទៀតនៅថ្ងៃទី១៥ ខែមេសានេះ ចំខួប ១០៥ឆ្នាំនៃស្ថាបនិករដ្ឋកុម្មុយនីស្ត។
នៅក្នុងសប្ដាហ៍នេះ ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជិនពីង បានជួបពិភាក្សាគ្នាទៅរដ្ឋផ្លរីដា ជាទីដែលលោក ត្រាំ បានជំរុញទៅសមភាគីរបស់លោក ឲ្យខិតខំបន្ថែមទៀត ដើម្បីទប់ស្កាត់កម្មវិធីនុយក្លេអ៊ែររបស់កូរ៉េខាងជើង៕
