ទាហានដល់ទៅ ១៤០នាក់ ត្រូវបានសម្លាប់ ក្រោយការបាញ់ប្រហាររបស់ខ្មាន់កាំភ្លើងជាជនសកម្មប្រយុទ្ធតាលីបង់ ដែលបានស្លៀកពាក់ឯកសណ្ឋានជាទាហានអាហ្វហ្កានីស្ថាន កាលពីថ្ងៃម្សិលមិញ ដែលអំពើហិង្សានេះ ត្រូវបានគេចាត់ទុកការវាយប្រហារដ៏បង្ហូរឈាមបំផុតមិនធ្លាប់កើតមាននៅក្នុងមូលដ្ឋានយោធាអាហ្វហ្កានីស្ថាន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
មន្ត្រីម្នាក់នៅទីក្រុងម៉ាហ្សាអ៊ីហ្សារីហ្វ ស្ថិតនៅភាគខាងជើងប្រទេសអាហ្វហ្កានីស្ថាន បាននិយាយនៅថ្ងៃនេះថា យ៉ាងហោចណាស់ទាហាន ១៤០នាក់ ត្រូវបានគេសម្លាប់ ហើយជាច្រើននាក់ទៀត បានរងរបួស។ មន្ត្រីផ្សេងទៀតនិយាយថា ចំនួនអ្នកស្លាប់អាចនឹងកើនឡើងខ្ពស់ជាងនេះ។
ក្រុមមន្ត្រីទាំងនោះ និយាយក្នុងលក្ខខណ្ឌមិនបញ្ចេញឈ្មោះដោយសារតែរដ្ឋាភិបាលមិនទាន់បានបញ្ចេញតួលេខមហន្តរាយជាផ្លូវការនៅឡើយ។
មន្ត្រីអាមេរិកម្នាក់នៅទីក្រុងវ៉ាស៊ីងតោន បានប៉ាន់ស្មានកាលពីថ្ងៃម្សិលមិញថា ចំនួនអ្នកស្លាប់ និងរងរបួស អាចច្រើនជាង ៥០នាក់។
ក្រុមមន្ត្រីរដ្ឋាភិបាលអាហ្វហ្កានីស្ថាន បាននិយាយថា ពួកសកម្មប្រយុទ្ធតាលីបង់ដល់ទៅ ១០នាក់ ស្លៀកពាក់ឯកសណ្ឋានយោធា និងបើកបររថយន្តយោធាចូលទៅក្នុងមូលដ្ឋានកងទ័ព ហើយបាញ់ប្រហារទៅលើទាហានកំពុងបរិភោគអាហារពេលល្ងាច និងត្រៀមចេញទៅថ្វាយបង្គំព្រះនៅក្នុងវិហារមួយនៅល្ងាចថ្ងៃម្សិលមិញនេះ។ ពួកសកម្មប្រយុទ្ធបានប្រើគ្រាប់បែក និងកាំភ្លើងបាញ់រះទៅលើពួកទាហាន៕