ក្រុមហ៊ុនអាកាសចរណ៍ American Airlines បានបណ្ដេញចោលបុគ្គលិកម្នាក់ ក្រោយពីវីដេអូមួយបង្ហាញនូវជម្លោះដ៏រញ៉េរញ៉ៃនៅលើជើងហោះហើរមួយគ្រឿង ពាក់ព័ន្ធនឹងបុគ្គលិក អ្នកដំណើរច្រើននាក់ និងស្ត្រីម្នាក់បីកូនយំសោក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
កាលពីថ្ងៃសុក្រ អ្នកប្រើប្រាស់បណ្ដាញហ្វេសប៊ុកម្នាក់ បានរៀបរាប់នៅលើហ្វេសប៊ុករបស់គេអមទៅដោយវីដេអូថា បុគ្គលិកក្រុមហ៊ុន American Airlines បានទាញរទេះកូនក្មេងទាំងហិង្សាពីស្ត្រីម្នាក់នោះ និងបានវាយទៅលើស្ត្រីរូបនោះ ប៉ុន្តែ មិនត្រូវចំកូនង៉ែតនោះឡើយ។
អ្នកនាំពាក្យក្រុមហ៊ុនអាកាសចរណ៍នេះ បាននិយាយថា រឿងហេតុនោះបានកើតឡើងនៅលើយន្តហោះជើងហោះហើរ ៥៩១ ក្នុងដំណើរពីទីក្រុងសាន់ហ្វ្រាន់ស៊ីស្កូ ទៅទីក្រុងដាឡាស មុនយន្តហោះនោះចេញដំណើរ។ ភាគីខាងក្រុមហ៊ុនបន្ថែមថា រឿងហេតុកើតចេញជាជម្លោះនៅពេលស្ត្រីរូបនោះបានសួរថា តើនាងអាចយករទេះរុញកូនក្មេងនោះឡើងទៅលើយន្តហោះបានឬទេ។
រឿងហេតុនេះ បានកើតឡើងមិនដល់ ២សប្ដាហ៍ផង ក្រោយពីវេជ្ជបណ្ឌិត David Dao ត្រូវបានគេបញ្ជូនទៅមន្ទីរពេទ្យ ក្រោយពីត្រូវបានសន្តិសុខចាប់ទាញអូសចេញពីយន្តហោះមួយគ្រឿងរបស់ក្រុមហ៊ុន United Airlines ដែលជំរុញឲ្យមានកំហឹងពីមហាជនចំពោះក្រុមហ៊ុននេះ៕