ក្រុមឃោសនាបោះឆ្នោតរបស់បេក្ខជនប្រធានាធិបតីបារាំង លោក អេម៉ានុយអ៊ែល ម៉ាក្រុន បាននិយាយកាលពីថ្ងៃម្សិលមិញថា ពួកគេបានក្លាទៅជាគោលដៅនៃការវាយប្រហារតាមប្រព័ន្ធកុំព្យូទ័ររបស់ក្រុមហ៊ែកឃ័រ ដែលចូលលុបចោលយុទ្ធនាការឃោសនារបស់ពួកគេតាមប្រព័ន្ធអនឡាញជាង ១ថ្ងៃមុនប្រជាពលរដ្ឋសម្រេចជ្រើសរើសរវាងបេក្ខជនកណ្ដាលនិយម និងបេក្ខនារីស្ដាំនិយមជ្រុល អ្នកស្រី ម៉ារីន ឡឺ ប៉ែន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយបន្តថា ទិន្នន័យទំហំប្រហែល ៩ជីហ្កាបៃ ត្រូវបានបង្ហោះដោយអ្នកប្រើប្រាស់បណ្ដាញកុំព្យូទ័រម្នាក់ហៅថា EMLEAKS to Pastebin ជាលីងចែករំលែកឯកសារមួយ ដែលអនុញ្ញាតឲ្យជនអនាមិកបង្ហោះបាន។ ភ្លាមៗនេះ គេមិនដឹងច្បាស់ទេថា តើនរណាជាអ្នកទទួលខុសត្រូវចំពោះការបង្ហោះទិន្នន័យនោះ ឬក៏មួយណាជាឯកសារដើមនោះឡើយ។
ក្នុងសេចក្ដីប្រកាសព័ត៌មានមួយ ក្រុមឃោសនារបស់លោក ម៉ាក្រុន បានបញ្ជាក់ថា ឯកសារនោះត្រូវបានគេហ៊ែក។
មន្ត្រីម្នាក់នៅក្រសួងមហាផ្ទៃបារាំង បានបដិសេធផ្ដល់យោបល់ ដោយលើកឡើងពីច្បាប់បារាំង ដែលហាមឃាត់ការបញ្ចេញមតិណាមួយ ដែលជះឥទ្ធិពលទៅដល់ការបោះឆ្នោត។
មតិអំពីអ៊ីម៉ែលដែលត្រូវបានគេហ៊ែកនោះ បានចាប់ផ្ដើមនៅល្ងាចថ្ងៃសុក្រម្សិលមិញនេះ តែប៉ុន្មានម៉ោងមុននឹងការបិទបញ្ចប់ជាផ្លូវការនូវយុទ្ធនាការឃោសនាបោះឆ្នោត។ បម្រាមនេះ នឹងស្ថិតនៅជាធរមានរហូតដល់ការបិទបញ្ចប់ការបោះឆ្នោតទាំងស្រុងនៅថ្ងៃស្អែកនេះ។
ការស្ទង់មតិនានាបង្ហាញថា បេក្ខជនកណ្ដាលនិយមមិនមានបក្សនយោបាយ លោក ម៉ាក្រុន នាំមុខលើបេក្ខនារីចលនាជាតិ អ្នកស្រី ឡឺ ប៉ែន នៅក្នុងការបោះឆ្នោតជុំទីពីរនៅថ្ងៃស្អែកនេះ៕