អ្នករាយការណ៍ពិសេសរបស់អង្គការសហប្រជាជាតិទទួលបន្ទុកខាងការសម្លាប់មនុស្សក្រៅប្រព័ន្ធតុលាការ កាលពីថ្ងៃម្សិលមិញនេះ បានថ្កោលទោសចំពោះការប្រើប្រាស់អំពើហិង្សាក្នុងការបង្ក្រាបគ្រឿងញៀនខុសច្បាប់ ខណៈដែលអ្នកស្រីបំពេញទស្សនកិច្ចក្រៅផ្លូវការទៅកាន់ប្រទេសហ្វីលីពីន ដែលបង្កឲ្យប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ ផ្ទុះកំហឹង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ចាប់តាំងពីឆ្នាំមុន អ្នកស្រី អ៊ែកណេស ខាឡាម៉ាដ ចង់ធ្វើដំណើរទៅប្រទេសហ្វីលីពីន ដើម្បីស៊ើបអង្កេតសង្គ្រាមគ្រឿងញៀនរបស់លោក ឌូទើតេ ដែលបានសម្លាប់មនុស្សរាប់ពាន់នាក់ និងបានឈានទៅដល់ចំណុចមួយ ដែលអាចធ្វើឲ្យលោកកំពុងតែប្រព្រឹត្តឧក្រិដ្ឋកម្មប្រឆាំងមនុស្សជាតិ។
ក្នុងសុន្ទរកថាមួយនៅឯសាកលវិទ្យាល័យម៉ានីឡា អ្នកស្រី ខាឡាម៉ាដ បានព្រមានអំពីពុតត្បុតជាច្រើនរបស់រដ្ឋាភិបាល ដែលបានជ្រើសរើសយកទង្វើហិង្សាឆ្លើយតបនឹងបញ្ហាគ្រឿងញៀន ហើយអ្នកស្រីថា អ្នកស្រីកំពុងឃ្លាំមើលយ៉ាងដិតដល់ចំពោះហេតុការណ៍នានានៅក្នុងប្រទេសហ្វីលីពីន។
អ្នកស្រីក៏បានកោតសរសើរដល់អ្នកទាំងឡាយនៅក្នុងប្រទេសហ្វីលីពីន ដែលហ៊ាននិយាយរិះគន់ប្រឆាំងនឹងសង្គ្រាមគ្រឿងញៀនរបស់លោក ឌូទើតេ ផងដែរ៕
