សិស្សសាលាជិត ២០០នាក់ ត្រូវបានគេបញ្ជូនទៅមន្ទីរពេទ្យកាលពីថ្ងៃម្សិលមិញនេះ ក្រោយការបែកធ្លាយឧស្ម័ននៅជិតសាលារៀនរបស់ពួកគេ នៅទីក្រុងញូវដេលី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ប៉ូលិសបាននិយាយថា ការបង្រៀនកំពុងតែប្រព្រឹត្តទៅ នៅពេលដែលឧស្ម័នបានបែកធ្លាយចេញពីរថយន្តស៊ីទែនមួយ ដែលចតនៅនឹងការ៉ាស់សាំងមួយកន្លែង នៅជាប់នឹងសាលារៀននោះ និងផ្ទុកទៅដោយសារធាតុពុលសម្រាប់ការប្រើប្រាស់ក្នុងឧស្សាហកម្ម។ ក្មេងៗបានត្អួញត្អែអំពីភាពឈឺផ្សារក្នុងភ្នែក និងបំពង់ករបស់ពួកគេ ក្រោយពីហេតុការណ៍នោះ។
ប៉ូលិសបន្ថែមថា សិស្សសាលាប្រហែល ២០០នាក់ ត្រូវបានគេបញ្ជូនទៅព្យាបាលនៅមន្ទីរពេទ្យ ៤កន្លែង។ គ្មាននរណាម្នាក់រងរបួសធ្ងន់ធ្ងរនោះឡើយ៕