ការបំផ្ទុះគ្រាប់បែក ២លើកនៅក្នុងរដ្ឋធានីម៉ានីល កាលពីយប់ថ្ងៃសៅរ៍ បានសម្លាប់មនុស្ស ២នាក់ និងបណ្ដាលឲ្យមនុស្ស ៦នាក់ទៀតរងរបួស ដែលអំពើហិង្សានេះបានកើតឡើងតែជាងមួយសប្ដាហ៍ប៉ុណ្ណោះក្រោយពីការបំផ្ទុះគ្រាប់បែកមួយនៅក្នុងតំបន់ដដែលនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីប៉ូលិសហ្វីលីពីន។
អាជ្ញាធរហ្វីលីពីន ដំបូងឡើយបាននិយាយថា គ្មានសញ្ញាណាមួយបញ្ជាក់ថា ការបំផ្ទុះគ្រាប់បែកនោះ គឺជាការវាយប្រហារភេរវកម្មនោះទេ ប៉ុន្តែ ក្រុមរដ្ឋឥស្លាមបានប្រកាសទទួលខុសត្រូវចំពោះការវាយប្រហារនេះ។
ពួកបះបោរបានអះអាងថា ចំនួនអ្នកស្លាប់ក្នុងអំពើហិង្សានោះ មានចំនួនច្រើនជាងតួលេខដែលផ្ដល់ដោយប៉ូលិស ហើយថា វាគឺជាការវាយប្រហារប្រឆាំងនឹងពួកមូស្លីមនិកាយស៊ីអ៊ីត។
ប្រព័ន្ធផ្សព្វផ្សាយ Amaq របស់ក្រុមរដ្ឋឥស្លាម បានប្រកាសថា ពួកស៊ីអ៊ីត ៥នាក់ ត្រូវបានសម្លាប់ ហើយ ៦នាក់ទៀតបានរងរបួស នៅក្នុងហេតុការណ៍បំផ្ទុះគ្រាប់បែកធ្វើឡើងដោយជនសកម្មប្រយុទ្ធរដ្ឋឥស្លាម នៅកណ្ដាលទីក្រុងម៉ានីល៕