ប្រទេសចិន នៅថ្ងៃនេះ បានអំពាវនាវឲ្យមានភាពអត់ធ្មត់ និងកុំឲ្យភាគីណាធ្វើអ្វីដើម្បីធ្វើឲ្យភាពតានតឹងកាន់តែអាក្រក់នោះឡើយ ក្រោយពីកូរ៉េខាងជើងបានបាញ់គ្រាប់មីស៊ីលថ្មីមួយទៀតនៅថ្ងៃនេះ រំលោភទៅនឹងការអំពាវនាវឲ្យរំសាយកម្មវិធីអាវុធរបស់ប្រទេសនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្រសួងការបរទេសចិន បាននិយាយក្នុងសេចក្ដីថ្លែងការណ៍មួយថា សេចក្ដីសម្រេចរបស់ក្រុមប្រឹក្សាសន្តិសុខ បានចែងច្បាស់អំពីកូរ៉េខាងជើង ដែលបានប្រើប្រាស់បច្ចេកវិទ្យាបាឡេស្ទីក សម្រាប់បាញ់មីស៊ីល។ ក្រសួងនេះបន្ថែមថា ចិនជំទាស់នឹងសកម្មភាពបាញ់គ្រាប់មីស៊ីលរបស់កូរ៉េខាងជើង ដែលផ្ទុយទៅនឹងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
ក្រសួងការបរទេសចិនរៀបរាប់ថា បច្ចុប្បន្ននេះ ស្ថានភាពនៅឧបទ្វីបនេះ ស្មុគស្មាន និងរស៊ើប ហើយភាគីពាក់ព័ន្ធទាំងអស់គួរតែប្រកាន់យកភាពអត់ធ្មត់ និងមិនត្រូវធ្វើអ្វីជំរុញឲ្យភាពតានតឹងនៅក្នុងតំបន់កាន់តែអាក្រក់ថែមទៀតនោះទេ៕