ប្រធានាធិបតីអាមេរិក លោក ដូណាល់ ត្រាំ បានថ្លែងនៅថ្ងៃនេះថា លោកនឹងតែងតាំងមេ FBI ថ្មីឲ្យបានឆាប់ បន្ទាប់ពីលោកបានបង្កឲ្យមានកំសួលនយោបាយ ក្រោយការបណ្ដេញលោក James Comey ចេញពីតំណែង ដែលបានធ្វើការស្រាវជ្រាវទៅលើការសមគំនិតគ្នារវាងរុស្ស៊ី និងក្រុមយុទ្ធនាការឃោសនារបស់លោក ត្រាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
លោក ត្រាំ បានប្រាប់ក្រុមអ្នកយកព័ត៌មានថា លោកអាចមានលទ្ធភាពធ្វើសេចក្ដីសម្រេចចិត្តថាគួរជ្រើសរើសនរណាឲ្យកាន់តំណែងនេះបន្តទៅលោក James Comey មុននឹងលោក ត្រាំ ចាកចេញទៅបំពេញទស្សនកិច្ចនៅក្រៅប្រទេសជាលើកដំបូង។
លោក ត្រាំ ថ្លែងថា លោកគិតថា ដំណើរការនឹងកើតឡើងយ៉ាងលឿន ដោយលោកបន្ថែមថា បេក្ខជនដែលកំពុងស្ថិតនៅក្រោមការពិចារណានោះ សុទ្ធតែជាមនុស្សមានឈ្មោះល្បីបំផុត។
ក្រុមអ្នករិះគន់ បានវាយប្រហារទៅលើលោក ត្រាំ ដែលបានបណ្ដេញលោក Comey យ៉ាងតក់ក្រហល់ បន្ទាប់ពីលោក Comey បានដឹកនាំការស៊ើបអង្កេតមួយទៅលើការចោទថា រុស្ស៊ីស្ថិតនៅពីក្រោយយុទ្ធនាការឃោសនាបោះឆ្នោតរបស់លោក ត្រាំ កាលពីឆ្នាំមុន៕
