កាសែតអាមេរិកបានចុះផ្សាយនៅថ្ងៃនេះថា ក្រុងប៉េកាំងបានបំបែកចារកម្ម CIA របស់អាមេរិកជាប្រព័ន្ធ នៅក្នុងប្រទេសចិន ចាប់តាំងពីឆ្នាំ២០១០ ដោយបានសម្លាប់ ឬក៏ចាប់ឃុំខ្លួនប្រភពផ្ដល់ព័ត៌មានសម្ងាត់មិនក្រោមរាប់សិបនាក់នោះឡើយ ដែលនេះគឺជាបរាជ័យមួយចំពោះទីភ្នាក់ងារចារកម្មអាមេរិក។ នេះដោយយោងតាមការចុះផ្សាយរបស់ AFP។
កាសែត New York Times ដែលបានដកស្រង់សម្ដីអតីត និងបច្ចុប្បន្នជាមន្ត្រីអាមេរិក ១០នាក់ ដែលបាននិយាយក្នុងលក្ខខណ្ឌមិនបញ្ចេញឈ្មោះនោះ បានចាត់ទុកបរាជ័យរបស់ទីភ្នាក់ងារចារកម្មអាមេរិកថា ជាបរាជ័យអាក្រក់មួយនៅក្នុងរយៈពេលប៉ុន្មានទសវត្សរ៍មកនេះ។
កាសែតអាមេរិកមួយនេះចុះផ្សាយថា សូម្បីតែភ្នាក់ងារចារកម្មអាមេរិកសព្វថ្ងៃនេះ ក៏មិនច្បាស់ទេថា តើភ្នាក់ងាចារកម្មនៅ CIA បានក្បត់អាមេរិក ឬក៏ទីភ្នាក់ងារចារកម្មចិនបានលួចចូលក្នុងប្រព័ន្ធសម្ងាត់ ដែលទីភ្នាក់ងារ CIA ប្រើប្រាស់សម្រាប់ទាក់ទងគ្នាជាមួយប្រភពនៅឯបរទេស។
កាសែតនេះបន្ថែមថា ទោះយ៉ាងណា ប្រភពព័ត៌មានសម្ងាត់ CIA យ៉ាងតិចរាប់សិបនាក់ ត្រូវបានគេសម្លាប់នៅចុងឆ្នាំ២០១០ និងនៅចុងឆ្នាំ២០១២ ក្នុងនោះមានភ្នាក់ងារចារកម្មម្នាក់ ត្រូវបានគេបាញ់សម្លាប់នៅនឹងមុខសហសេវិក ដែលជាសារព្រមានយ៉ាងច្បាស់ទៅលើអ្នកផ្សេងទៀតដែលនឹងចូលទៅស៊ើបការសម្ងាត់។
យោងតាមអតីតមន្ត្រីជាន់ខ្ពស់អាមេរិកដែលកាសែតនេះដកស្រង់សម្ដី បានឲ្យដឹងថា ជារួម ប្រភពចារកម្មចន្លោះពី ១៨ ទៅ ២០នាក់ នៅក្នុងប្រទេសចិន ត្រូវបានគេសម្លាប់ ឬក៏ចាប់ដាក់ឃុំ៕
