កម្ពុជា-វៀតណាមបានប្ដេជ្ញាពង្រឹងកិច្ចសហប្រតិបត្តិការរួមគ្នាទប់ស្កាត់ ប្រយុទ្ធប្រឆាំង និង បង្រ្កាបពាណិជ្ជកម្មឆ្លងដែនខុសច្បាប់ ដូចជាព្រៃឈើ សត្វព្រៃ កៅស៊ូធម្មជាតិ និង ផលិតផលផ្សេងៗទៀត។
នេះបើតាមសេចក្ដីជូនព័ត៌មានចុះថ្ងៃទី ១៨ ខែ ឧសភា របស់ក្រសួងការបរទេស អំពីលទ្ធផលកិច្ចប្រជុំគណៈ
កម្មការចម្រុះកម្ពុជា-វៀតណាមលើកទី ១៦ ស្ដីពីកិច្ចសហប្រតិបត្តិការសេដ្ឋកិច្ច វប្បធម៌ វិទ្យាសាស្រ្ត និងបច្ចេកវិទ្យានៅទីក្រុងហាណូយប្រទេសវៀតណាម ដោយលើកឡើងពីលទ្ធផលសម្រេចជាច្រើនទាក់ទងនឹងបញ្ហាព្រំដែន កិច្ចសហប្រតិបត្តិការទេសចរណ៍ វិស័យធនធានទឹក វិស័យសេដ្ឋកិច្ច និងការវិនិយោគ វិស័យសន្តិសុខ វិស័យអប់រំ និង វិស័យកសិកម្មជាដើម។
ក្នុងសេចក្ដីជូនព័ត៌មានលទ្ធផលនៃកិច្ចប្រជុំនៃវិស័យកសិកម្ម និង រុក្ខាប្រមាញ់ ភាគីកម្ពុជា និង វៀតណាមបានប្ដេជ្ញា ពង្រឹងកិច្ចសហប្រតិបត្តិការរួមគ្នាទប់ស្កាត់ ប្រយុទ្ធប្រឆាំង និង បង្រ្កាបពាណិជ្ជកម្មឆ្លងដែនខុសច្បាប់ មានទាំងព្រៃឈើ សត្វព្រៃ កៅស៊ូធម្មជាតិ និង ផលិតផលផ្សេងទៀត តាមរយៈការផ្លាស់ប្ដូរព័ត៌មាន និងជួបប្រជុំជាទៀងទាត់រវាងមន្រ្តីអនុវត្តន៍ច្បាប់ និង អាជ្ញាធរខេត្តតាមព្រំដែន។
ជាមួយគ្នានោះភាគីទាំង ២ក៏បានយល់ព្រមជំរុញសហប្រតិបត្តិការលើវិធានការអនាម័យ និងរុក្ខអនាម័យ ដើម្បីគ្រប់គ្រងជម្ងឺនៅតាមតំបន់ព្រំដែនរវាងប្រទេសទាំងពីរផងដែរ។
ចំណែកវិស័យសន្តិសុខ និងការប្រយុទ្ធប្រឆាំងឧក្រិដ្ឋកម្ម ភាគីទាំង២ បានបញ្ជាក់ជំហរមិនអនុញ្ញាតឲ្យមានកងទ័ពអមិត្តណាមួយប្រើប្រាស់ទឹកដីរបស់ខ្លួន ដើម្បីធ្វើការបំផ្លិតបំផ្លាញទៅដល់សន្តិសុខ និង អន្តរាគមន៍ទៅលើកិច្ចការផ្ទៃក្នុងរបស់ប្រទេសណាមួយឡើយ៕
