រដ្ឋអំណាចទីក្រុងប៉េកាំងបានសម្តែងការថ្កោលទោសយ៉ាងខ្លាំង ចំពោះសកម្មភាពនាវាចម្បាំងរបស់សហរដ្ឋអាមេរិកបានបើកចូលក្នុងតំបន់ដែនទឹកកំពុងមានជម្លោះនៅក្នុងសមុទ្រចិនខាងត្បូង។
រដ្ឋមន្ត្រីការបរទេសរបស់ចិនបានចេញសេចក្តីថ្លែងការណ៍មួយប្រឆាំងនឹងសកម្មភាពនាវាចម្បាំងរបស់អាមេរិចូលទៅដល់កម្រងកោះប៉ារ៉ាសែល។ នេះបើតាមទីភ្នាក់ងារព័ត៌មានAFP។
ទោះយ៉ាងណាខាងសហរដ្ឋអាមេរិកបានថ្លែងថា សកម្មភាពនេះគឺជាដំណើរមួយនៃការទាមទារឲ្យមានសេរីភាពនៃការធ្វើនាវាចរណ៍តែប៉ុណ្ណោះ ហើយប្រឆាំងចំពោះការអះអាងរបស់ចិនដែលថា តំបន់នោះគឺជាកន្លែងគ្រប់គ្រងផ្តាច់មុខតែម្នាក់ឯង។
នាវាពេជ្ឈឃាតទាំងពីររបស់អាមេរិកនេះចូលក្នុងតំបន់មានជម្លោះដោយមិនមានការអនុញ្ញាតជាមុននោះទេ ហើយបានទៅជួបជាមួយនាវាយាមល្បាតរបស់យោធាចិន។
ទីភ្នាក់ងារព័ត៌មានរដ្ឋចិនស៊ីនហួរ បានចុះផ្សាយថា នាវាអាមេរិកទាំងពីរនេះ ត្រូវបានបណ្តេញចេញពីដែនទឹករបស់ខ្លួនវិញក្រោយពេលជួបប្រទះកងល្បាតរបស់ចិន។
សកម្មភាពរបស់នាវាចម្បាំងអាមេរិកនេះ បន្ទាប់ពីទីក្រុងប៉េកាំងបានបញ្ជូននាវា ដែលមានលទ្ធភាពផ្ទុកអាវុធនុយក្លេអ៊ែទៅក្នុងតំបន់កំពុងមានជម្លោះនោះកាលពីសប្តាហ៍មុន។
តំបន់មានជម្លោះនោះ កាន់តែមានភាពតានតឹងជាបន្តបន្ទាប់ ក្រោយពេលដែលរដ្ឋអំណាចទីក្រុងប៉េកាំងបានកសាងមូលដ្ឋានទ័ពនៅទីនោះ ក្រោមហេតុផលថា ដើម្បីរក្សាសន្តិសុខ សម្រាប់ផ្លូវនាវាចរណ៍របស់ពិភពលោក។