ភរិយាសពអ្នកវិភាគល្បីឈ្មោះ លោក បណ្ឌិត កែម ឡី ស្នើទៅគណបក្សនយោបាយថ្មីមួយកុំយកឈ្មោះនិងរូបស្វាមីរបស់គាត់ទៅឃោសនាប្រាប់ប្រជាពលរដ្ឋ ដើម្បីទាក់ទាញសំឡេងឆ្នោត ដោយថា គណបក្សនេះ មិនអាចរកយុត្តិធម៌ជូនស្វាមីរបស់អ្នកស្រីបានទេ។
ការស្នើនេះ ធ្វើឡើងបន្ទាប់ពីលោក គុជ លី អ្នកនាំពាក្យ«គណបក្សខ្មែរតែមួយ»របស់ប្អូនលោក កែម ឡី គឺលោក កែម រិទ្ធីសិត បានយករូបថតលោក កែម ឡី បង្ហោះលើហ្វេសប៊ុកដោយភ្ជាប់ជាមួយគណបក្សរបស់ខ្លួន ដើម្បីស្វែងការគាំទ្រពីប្រជាពលរដ្ឋ។ នៅលើគណនីហ្វេសប៊ុករបស់លោក គុជ លី ដែលមានឈ្មោះថា «Kuch Kuch»បានសរសេរថា យើងត្រូវបន្តដំណើរ ដើម្បីស្វែងរកយុត្តិធម៌ជូនសពបណ្ឌិត កែម ឡី។
ប៉ុន្តែភរិយាសពលោក កែម ឡី គឺអ្នកស្រី ប៊ូ រចនា បានសរសេរនៅលើគណនីហ្វេសប៊ុករបស់អ្នកស្រីនៅថ្ងៃនេះថា លោក គុជ លី គ្មានសិទ្ធិយកឈ្មោះស្វាមីរបស់អ្នកស្រីទៅឃោសនា ដោយគ្មានការអនុញ្ញាតពីអ្នកស្រីឡើយ។
អ្នកស្រី ប៊ូ រចនា ភរិយាសពលោក កែម ឡី
អ្នកនាំពាក្យនាំគណបក្សខ្មែរតែមួយ លោក គុជ លី ច្រានចោលការអះអាងភរិយាលោក កែម ឡី ដោយថា ប្រសិនបើគណបក្សនេះឈ្នះឆ្នោត លោកនឹងស្វែងរកអ្នកពាក់ព័ន្ធនៅពីក្រោយឃាតកម្មលោក កែម ឡី ។
លោក គុជ លី អ្នកនាំពាក្យនាំគណបក្សខ្មែរតែមួយ
អ្នកវិភាគនយោបាយវ័យក្មេង លោក ហង្ស វិទូ យល់ថា ការប្រតិកម្មរបស់ភរិយាលោក កែម ឡី ថាជារឿងត្រឹមត្រូវ ។
លោកថា៖«មានន័យថា បក្សរបស់ខ្លួនមិនមានលទ្ធភាពគ្រប់គ្រាន់ធ្វើអ្វីទេ , ទី២ វាធ្វើឲ្យខូចតម្លៃលោកបណ្ឌិត កែម ឡី ទៀតអ្នកដែលស្អាតស្អំនៅក្នុងរឿងកិច្ចការងារប្រទេសជាតិ ទី៣ ធ្វើឲ្យប្រជាពលរដ្ឋលែងគាំទ្រគណបក្សពួកគាត់តែម្ដង ដោយសារ តែគេមើលឃើញគំនិតដែលគាត់គិតមកហ្នឹង វាចង់ចំណេញនយោបាយ»។
អ្នកស្រី ប៊ូ រចនា និងកូនប្រុសទាំង ៥នាក់របស់អ្នកស្រី ទទួលបានសិទ្ធិជ្រកកោននៅក្នុងប្រទេសអូស្ត្រាលីហើយ បន្ទាប់ពីរស់នៅដោយលាក់ខ្លួននៅក្នុងប្រទេសថៃក្រោយពីស្វាមីរបស់អ្នកស្រីត្រូវបានខ្មាន់កាំភ្លើងបាញ់សម្លាប់កាលពីខែកក្កដា ឆ្នាំ២០១៦។
រហូតមកដល់សព្វថ្ងៃនេះ អាជ្ញាធរកម្ពុជា បានចាប់ខ្លួនបុរសម្នាក់ប៉ុណ្ណោះ ឈ្មោះ អឿត អាង ហៅខ្លួនឯងថា «ជួប សម្លាប់» ដោយកាត់ទោសឲ្យជាប់ពន្ធនាគារមួយជីវិត នៅក្នុងករណីឃាតកម្មលើអ្នកវិភាគល្បីឈ្មោះលោក កែម ឡី។
