សំណុំរឿងទីពីរ ក្នុងចំណោមសំណុំរឿងចំនួនពីរដែលចោទពីបទ «បរិហារកេរ្តិ៍ និងញុះញង់» ទៅលើអ្នកវិភាគនយោបាយ លោក គឹម សុខ ត្រូវបានបើកសវនាការជំនុំជម្រះកាលពីថ្ងៃទី៥ ខែធ្នូ ឆ្នាំ២០២២។
សាលាដំបូងរាជធានីភ្នំពេញ កាលពីថ្ងៃចន្ទម្សិលមិញ បានបើកសវនាការជំនុំជម្រះសំណុំរឿងលោក គឹម សុខ ដែលកំពុងរស់នៅក្រៅប្រទេស។ កន្លងមក តុលាការបានផ្តន្ទាទោសលោកឱ្យជាប់ពន្ធនាគាររយៈពេល ១៨ខែ លើសំណុំរឿងទីមួយ ក្នុងចំណោមសំណុំរឿងពីរដែលពាក់ព័ន្ធគ្នា។
សំណុំរឿងទាំងពីរនោះទាក់ទងនឹងការផ្ដល់បទសម្ភាសតាមវិទ្យុកាលពីខែកុម្ភៈ ឆ្នាំ២០១៧ ដោយចោទប្រកាន់គណបក្សប្រជាជនកម្ពុជា ថាជាអ្នកនៅពីក្រោយឃាតកម្មលើលោក កែម ឡី ដែលជាអ្នកវិភាគនយោបាយ។
ក្រៅពីមន្ត្រីតុលាការ សវនាការជំនុំជម្រះដែលមានរយៈពេល ៤៥នាទី មានអ្នករាយការណ៍ព័ត៌មានតែពីរនាក់ និងសាធារណជនម្នាក់ប៉ុណ្ណោះដែលមានវត្តមាន ខណៈទាំងលោក គី តិច មេធាវីដើមបណ្ដឹងដែលតំណាងឱ្យលោកនាយករដ្ឋមន្ត្រី ហ៊ុន សែន និងមេធាវីការពារក្ដីលោក ជូង ជូងី មិនមានវត្តមាននោះទេ។
សវនាការបានដំណើរការ ដោយក្រឡាបញ្ជីបាននិយាយថា លិខិតត្រូវបានផ្ញើទៅភាគីទាំងពីរតាមរយៈមន្ត្រីនគរបាល ហើយមិនមានភាគីណាមួយស្នើសុំពន្យារពេលសវនាការឡើយ។ តំណាងអយ្យការបានស្នើសុំឱ្យបន្តសវនាការ។
ក្រឡាបញ្ជី បានអានចម្លើយរបស់មេធាវីរដ្ឋាភិបាល គឺលោក គី តិច។ លោក គឹម សុខ បានផ្តល់បទសម្ភាសចំនួនពីរលើកដល់វិទ្យុអាស៊ីសេរី កាលពីថ្ងៃទី១១ និងទី១៣ ខែកុម្ភៈ ឆ្នាំ២០១៧ ដែលនៅក្នុងបទសម្ភាសទាំងពីរលើកនេះ លោក គឹម សុខ បានភ្ជាប់គណបក្សប្រជាជនកម្ពុជា ទៅនឹងឃាតកម្មលើលោក កែម ឡី ដែលត្រូវបានបាញ់សម្លាប់នៅស្ថានីយប្រេងឥន្ធនៈមួយកន្លែងក្នុងរាជធានីភ្នំពេញ កាលពីខែកក្កដា ឆ្នាំ២០១៦។
លោក គឹម សុខ បានជាប់ពន្ធនាគាររួចហើយ ពាក់ព័ន្ធនឹងបទសម្ភាសកាលពីថ្ងៃទី១១ ខែកុម្ភៈ ឆ្នាំ២០១៧ ហើយឥលូវនេះ លោកត្រូវបានជំនុំជម្រះពាក់ព័ន្ធនឹងបទសម្ភាសកាលពីថ្ងៃទី១៣ ខែកុម្ភៈ ឆ្នាំ២០១៧។ លោក គី តិច បានដាក់ពាក្យបណ្ដឹងនៅខែកុម្ភៈ ឆ្នាំ២០១៧។
ចម្លើយរបស់លោក គី តិច ជាមួយចៅក្រមស៊ើបសួរ បាននិយាយថា លោក គឹម សុខ បានញុះញង់ឱ្យមហាជនផ្ទុះកំហឹង និងបង្កអស្ថិរភាពសង្គម។
លោក គី តិច បានលើកឡើងថា៖ «ការអះអាងនេះបង្កប់ហេតុផលនយោបាយ ជាឧបាយកលញុះញង់ឱ្យមានចលាចល និងភាពស្អប់ខ្ពើមចំពោះសម្តេច ហ៊ុន សែន»។
លោក គី តិច បានទាមទារសំណងចំនួន១០០លានរៀល ឬប្រហែល២៥ ០០០ដុល្លារ។
ក្រឡាបញ្ជី ក៏បានអានចម្លើយរបស់លោក គឹម សុខ ដែលបានផ្តល់នៅដំណាក់កាលអយ្យការ នៅថ្ងៃទី៧ ខែមេសា ឆ្នាំ២០១៧ បន្ទាប់ពីការឃុំខ្លួនរូបលោក។
នៅក្នុងចម្លើយ ឆ្នាំ២០១៧ លោក គឹម សុខ បាននិយាយថា លោកមិនមានចេតនាញុះញង់នរណាម្នាក់ឡើយ ខណៈលោកនៅតែបន្តការជជែកវែកញែកអំពីឃាតកម្មបង្កប់ហេតុផលនយោបាយ។
លោកបានរៀបរាប់អំពីករណីមួយចំនួន ដូចជា លោក ធន់ ប៊ុនលី ចាងហ្វាងកាសែត និងជាអ្នករិះគន់រដ្ឋាភិបាល ត្រូវបានបាញ់សម្លាប់នៅថ្ងៃទី១៨ ខែឧសភា ឆ្នាំ១៩៩៦, អ្នកស្រី ពិសិដ្ឋ ពីលីកា ជាតារាសម្តែងដ៏មានប្រជាប្រិយភាពមួយរូប ត្រូវបានសម្លាប់នៅក្នុងខែកក្កដា ឆ្នាំ១៩៩៩ ចំពេលមានការអះអាងពីទំនាក់ទំនងជាមួយនឹងគ្រួសារលោកនាយករដ្ឋមន្រ្តី ហ៊ុន សែន, តារាចម្រៀង ទូច ស៊ុននិច និងអ្នកកាសែតប្រឆាំង លោក ជួ ជេដ្ឋារិទ្ធ ត្រូវបានបាញ់សម្លាប់ក្នុងសប្ដាហ៍តែមួយ ក្នុងខែតុលា ឆ្នាំ២០០៣, មេដឹកនាំសហជីព លោក ជា វិជ្ជា ត្រូវបានបាញ់សម្លាប់នៅខាងក្រៅវត្តលង្កា ក្នុងរាជធានីភ្នំពេញ ឆ្នាំ២០០៤, និងលោក ឈុត វុទ្ធី អ្នកការពារបរិស្ថាន ត្រូវបានបាញ់សម្លាប់កាលពីឆ្នាំ២០១២។
ក្នុងចម្លើយ លោក គឹម សុខ បានមានប្រសាសន៍ថា៖ «ប្រសិនបើគ្មានប្រព័ន្ធពិតប្រាកដ យ៉ាងហោចណាស់ក៏មានសំណុំរឿងមួយត្រូវគេផ្តន្ទាទោសដែរ»។
លោកអំពាវនាវឱ្យសមត្ថកិច្ចស្វែងរកឃាតកពិត និងបង្ហាញភស្តុតាងពីករណីទាំងឡាយ។
កាលពីថ្ងៃចន្ទ ព្រះរាជអាជ្ញា លោក ស៊ិត វណ្ណៈ បានថ្លែងថា លោក គឹម សុខ មិនមានភស្តុតាងគាំទ្រការអះអាងដែលមានលក្ខណៈបរិហារកេរ្តិ៍នេះឡើយ។
លោក ស៊ិត វណ្ណៈ បានថ្លែងថា៖ «ករណីនេះប៉ះពាល់សណ្ដាប់ធ្នាប់ និងសន្តិសុខសង្គម ដូច្នេះតំណាងអយ្យការស្នើសុំឱ្យចៅក្រមតម្កល់បទចោទ»។
លោក គឹម សុខ បានប្រាប់ វីអូឌី កាលពីខែមុនថា លោកដឹងថាមានសំណុំរឿងពីរប្រឆាំងនឹងរូបលោក ប៉ុន្តែលោកទើបតែដឹងអំពីសវនាការនេះ បន្ទាប់ពីមានអ្នកសារព័ត៌មានសាកសួរលោកអំពីរឿងនេះ។ លោកជឿថា សវនាការនេះមានគោលបំណងរារាំងលោកមិនឱ្យចូលរួមក្នុងនយោបាយ។
មេធាវីការពារក្តី លោក ជូង ជូងី បាននិយាយកាលពីថ្ងៃចន្ទថា លោកមិនបានទទួលដំណឹងពីតុលាការអំពីសវនាការនេះទេ។
លោក ជូង ជូងី បានថ្លែងថា៖ «ការមិនបញ្ជូនដល់មេធាវី គឺមិនត្រឹមត្រូវតាមច្បាប់ឡើយ។ សមត្ថកិច្ចមិនបានបំពេញភារកិច្ចរបស់ខ្លួនឱ្យបានត្រឹមត្រូវទេ»។
លោកចៅក្រម សេង សុជាតិ ថ្លែងថា លោកនឹងប្រកាសសាលក្រមនៅថ្ងៃទី១៨ ខែមករា ឆ្នាំ២០២៣៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Analyst Kim Sok Again on Trial for Political Killing Claim
