រដ្ឋាភិបាលកម្ពុជាកំពុងសិក្សាស្រាវជ្រាវបន្ថែមមុននឹងចាត់វិធានការទៅលើអង្ករថៃ ដែលត្រូវបានប្រទះឃើញដាក់រូបសញ្ញាអង្គរវត្ត និងប្រើប្រាស់ភាសាខ្មែរ កំពុងចរាចរណ៍នៅលើទីផ្សារ។
ក្នុងសេចក្តីប្រកាសព័ត៌មានកាលពីចុងខែកន្លងមកនេះ ដែលវីអូឌីទើបតែទទួលបាននៅថ្ងៃនេះ ក្រសួងពាណិជ្ជកម្ម បានលើកឡើងថា ផលិតផលអង្ករសម្រេចដែលច្រកនៅលើក្នុងសំបកបេមានភ្ជាប់ជាមួយអក្សរខ្មែរ «អង្ករក្រអូបពិសេស» ប៉ុន្តែ ភ្ជាប់ជាមួយអក្សរអង់គ្លេស«Product of Thailand [ផលិតផលថៃ]»នោះ កំពុងតែចរាចរណ៍នៅលើទីផ្សារទីក្រុងម៉ុងរ៉េអាល់ ប្រទេសកាណាដា។
ក្នុងសេចក្ដីប្រកាសព័ត៌មានដដែលនេះ ក្រសួងនេះ បានចាត់ទុកផលិតផលអង្ករភ្ជាប់ជាមួយរូបប្រាសាទអង្គរវត្តនេះថា ជាការបំភ័ន្តអ្នកប្រើប្រាស់អំពីប្រភពដើមនៃផលិតផល។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានឲ្យវីអូឌីដឹងនៅថ្ងៃនេះថា រហូតមកដល់ពេលនេះ ក្រសួងពុំទាន់ទទួលបានព័ត៌មានបន្ថែមលើអ្នកបន្លំពាណិជ្ជសញ្ញានេះនៅឡើយទេ ប៉ុន្តែថា ក្រសួងបានទំនាក់ទំនងទៅកាន់ក្រសួងពាណិជ្ជកម្មថៃ ដើម្បីចាត់វិធានការរួចហើយ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ
ទោះជាយ៉ាងណា ក្រសួងមិនទាន់កំណត់ពីការខាតបង់របស់កម្ពុជាដោយសារផលិតផលបន្លំប្រភពដើមទំនិញនេះនៅឡើយ។
របាយការណ៍របស់ក្រសួងកសិកម្មឲ្យដឹងថា ក្នុងរយៈពេល ៤ខែដើមឆ្នាំ២០១៨នេះ កម្ពុជាបាននាំចេញអង្ករជិត ២០ម៉ឺនតោនចេញទៅក្រៅប្រទេស ដែលនាំចេញដោយក្រុមហ៊ុនចំនួន ៦៧ក្រុមហ៊ុន៕
