លោកនាយករដ្ឋមន្ត្រី ហ៊ុន សែន បានព្រមានដកតំណែងមន្ត្រីយោធា ២រូប ពីក្របខណ្ឌក្រសួងការពារជាតិ បន្ទាប់ពីមន្ត្រីយោធាទាំង ២រូបនោះ បានផ្សព្វផ្សាយវិវាទដ៏ចម្រូងចម្រាស់រវាងអតីតចៅអធិការវត្តមួយអង្គ និងនារីម្នាក់ នៅឯខេត្តបន្ទាយមានជ័យ កាលពីសប្ដាហ៍មុន។
អធិករដ៏ចម្រូងចម្រាស់រវាងព្រះសង្ឃ ស្រិល វណ្ណា និងនារីម្នាក់ បានក្លាយជាប្រធានបទនៃការជជែកវែកញែកនៅលើបណ្ដាញសង្គមហ្វេសប៊ុកយ៉ាងព្រោងព្រាត បន្ទាប់ពីលោក ផែង វណ្ណៈ បានសម្ភាសជាមួយអតីតព្រះចៅអធិការវត្ត បាក់លើ និងផ្សាយផ្ទាល់តាមហ្វេសប៊ុក ហើយលោក ខ័ណ្ឌ ច័ន្ទសុផល ក៏បានសម្ភាស និងផ្សាយបន្តផ្ទាល់ជាមួយនារីម្នាក់ ដែលបានចោទព្រះតេជគុណ ស្រិល វណ្ណា ផងដែរ។
ថ្លែងក្នុងពិធីសម្ភោធកំណាត់ផ្លូវជាតិលេខ៦ នៅឯខេត្តកំពង់ធំនៅព្រឹកនេះ លោកនាយករដ្ឋមន្ត្រី ហ៊ុន សែន បានថ្លែងថា រឿងព្រះសង្ឃមានស្រីឆាន់ពោត ដែលបានបែកធ្លាយតាមបណ្តាញសង្គមហ្វេសបុកនៅពេលនេះ កំពុងតែធ្វើឲ្យប្រជាពលរដ្ឋកម្ពុជាជ្រួលច្របល់តាមអ្នកប្រើប្រាស់បណ្តាញសង្គម លោក ផែង វណ្ណៈ និងលោក ខ័ណ្ឌ ច័ន្ទសុផល ដែលលោកថា ជាមន្ត្រីយោធានៃក្រសួងការពារជាតិ។
លោកបានបន្ថែមថា ក្នុងនាមជាមន្ត្រីមិនគួរណាយករឿងបុគ្គលដែលត្រូវបានដោះស្រាយជិតស្ងប់ស្ងាត់ហើយ មកធ្វើឲ្យផ្អើលដល់សាធារណជននោះទេ ដោយលោកស្នើឲ្យបញ្ឈប់សកម្មភាពនេះជាបន្ទាន់ និងព្រមានដកមន្ត្រីទាំងពីរនាក់នោះផងដែរ។
លោកនាយករដ្ឋមន្ត្រី ហ៊ុន សែន
បន្ទាប់ពីលោក ហ៊ុន សែន ថ្លែងព្រមានជាសាធារណៈបែបនេះ លោក ផែង វណ្ណៈ និងលោក ខណ្ឌ័ ចន្ទ័សុផល បានសន្យានៅលើទំព័រហ្វេសប៊ុករបស់ពួកគេថា នឹងឈប់ផ្សព្វផ្សាយរឿងទាំងនោះទៀតហើយ។
អ្នកនាំពាក្យក្រសួងការពារជាតិលោក ឈុំ សុជាតិ បានប្រាប់វីអូឌីនៅថ្ងៃនេះថា លោក ផែង វណ្ណៈ គឺជាមន្ត្រីយោធាស័ក្តិ ៤កន្លះ បន្ទាប់ពីផ្ទេរពីក្រសួងមហាផ្ទៃ ខណៈដែលលោក ខ័ណ្ឌ ច័ន្ទសុផល ជាមន្ត្រីយោធាពាក់ស័ក្តិ ៤ នៅខុទ្ទកាល័យអគ្គមេបញ្ជាការយុទ្ធពលខេមរភូមិន្ទ លោក ប៉ុល សារឿន។
លោក ឈុំ សុជាតិ បានបន្ថែមថា ក្រសួងការពារជាតិ នឹងចាត់វិធានការនាពេលខាងមុខនេះ បន្ទាប់ពីប្រមូលបានទិន្នន័យរបស់មន្ត្រីយោធាទាំងពីររូបនេះ។
លោកថា៖ «ថ្នាក់ដឹកនាំក្រសួង និងថ្នាក់ដឹកនាំអគ្គបញ្ជាការ នឹងមានវិធានការហើយ ហៅគាត់ជួបដើម្បីធ្វើការណែនាំ ឬក៏អនុវត្តតាមបទបញ្ជារបស់ក្រសួងការពារជាតិ គឺមានផែនការហើយ»។
អ្នកស្រាវជ្រាវការអភិវឌ្ឍសង្គម លោក ប៉ា ច័ន្ទរឿន បានគាំទ្រទៅនឹងចំណាត់ការរបស់លោកនាយករដ្ឋមន្ត្រីនេះ តែលោកថា រដ្ឋាភិបាលគួរតែមានវិធានការទប់ស្កាត់បញ្ហានេះកុំឲ្យកើតមាន ជាជាងទប់ស្កាត់តែបញ្ហាបន្ទាប់ តែបញ្ហាដំបូងមិនត្រូវបានទប់ស្កាត់នោះ។
អ្នកស្រាវជ្រាវការអភិវឌ្ឍសង្គម លោក ប៉ា ច័ន្ទរឿន
លោក ផែង វណ្ណៈ និងលោក ខ័ណ្ឌ ច័ន្ទសុផល បានបង្ហោះរូបថតកាំភ្លើងនៅលើបណ្ដាញសង្គមហ្វេសប៊ុក និងបានគំរាមកំហែងទៅលើមេដឹកនាំអតីតគណបក្សសង្គ្រោះជាតិ លោក កឹម សុខា ផងដែរ កាលពីឆ្នាំ២០១៣កន្លងមក ប៉ុន្តែ អ្នកប្រើប្រាស់ហ្វេសប៊ុកទាំងពីររូបនេះ ដែលជាអ្នកគាំទ្របក្សកាន់អំណាចនោះ មិនត្រូវបានចោទប្រកាន់តាមផ្លូវតុលាការនោះឡើយ៕