នាយករដ្ឋមន្ត្រីកម្ពុជា លោក ហ៊ុន សែន រំឭកមន្ត្រីជាន់ខ្ពស់ ឲ្យសិក្សាពីផលប៉ះពាល់ដល់កម្ពុជា ដោយថា បើគ្មានអ្វីប្រែប្រួលទេ សង្គ្រាមពាណិជ្ជកម្មពិភពលោក នឹងផ្ទុះឡើងពេញទំហឹងនៅប៉ុន្មានថ្ងៃទៀតនេះ។
ក្នុងពិធីប្រកាសគោរមងារ ដល់មន្ត្រីជាន់ខ្ពស់មួយចំនួន នៅរាជបណ្ឌិត្យសភា នាថ្ងៃអង្គារនេះ លោក ហ៊ុន សែន ថ្លែងថា បើគ្មានអ្វីប្រែប្រួលទេ នៅប៉ុន្មានថ្ងៃទៀតនេះ សង្រ្គាមពាណិជ្ជកម្មពិភពលោក អាចនឹងផ្ទុះឡើងពេញទំហឹង។ លោកថា ដោយសារតែសហរដ្ឋអាមេរិក ហាក់បែកចេញពីប្រទេសកំពុងអភិវឌ្ឍចំនួន៦ផ្សេងទៀត រួមទាំងមានជម្លោះពាណិជ្ជកម្មជាមួយប្រទេសចិន។
លោក ហ៊ុន សែន ថ្លែងទៀតថា បញ្ហានេះ ជាសភាពការណ៍ថ្មីកំពុងស្ថិតនៅចំពោះមុខរបស់កម្ពុជា។ លោករំឭកឲ្យមន្ត្រីទៅរាជបណ្ឌិត្យសភាដែលជាធនាគារខួរក្បាល របស់រដ្ឋាភិបាល ត្រូវសិក្សាពីផលប៉ះពាល់ ដើម្បីឆ្លើយតបទៅនឹងបញ្ហានេះដែលអាចកើតឡើងនៅកម្ពុជា។
លោកថា៖«នេះជាបញ្ហាមិនតូចតាចទេ។ ពិតមែនតែបញ្ហាឧបទ្វីបកូរ៉េ បានធូរស្រាល។ ក៏ប៉ុន្តែបញ្ហាសកលបានកើតឡើងហើយ។ ហើយនេះជាបញ្ហាប្រឈមដ៏ធំសម្រាប់សេដ្ឋកិច្ចពិភពលោក ក៏ដូចជាសេដ្ឋកិច្ចនៅក្នុងតំបន់របស់យើង»។
បណ្ឌិតសេដ្ឋកិច្ចនៅរាជ្យបណ្ឌិត្យសភារបស់រដ្ឋាភិបាល លោក គី សេរីវឌ្ឍន៍ ឲ្យ VOD ដឹងតាមទូរស័ព្ទថា ក្រុមការងារ របស់លោកបានឯកភាពគ្នាថា នឹងសិក្សាពីបញ្ហានេះ។ ប៉ុន្តែលោកថា បើសង្គ្រាមពាណិជ្ជកម្មពិភពលោកផ្ទុះឡើងមែន កម្ពុជានឹងមិនប៉ះពាល់ធ្ងន់ធ្ងរទេដោយថា ទំនាក់ទំនងពាណិជ្ជកម្មរបស់កម្ពុជាមិនពឹងផ្អែកលើមហាអំណាចនៃប្រទេសណាមួយផ្តាច់មុខនោះទេ។
ទោះជាយ៉ាងណាក៏ដោយ បណ្ឌិតផ្នែកសេដ្ឋកិច្ចរូបនេះលើកឡើងថា បើសង្គ្រាមពាណិជ្ជកម្មពិភពលោកផ្ទុះមែន កម្ពុជានឹងរងផលប៉ះពាល់មុនគេ ផ្នែកវិស័យអចលនទ្រព្យ និងវិស័យកាត់ដេរ។
បណ្ឌិតសេដ្ឋកិច្ចនៅរាជ្យបណ្ឌិត្យសភារបស់រដ្ឋាភិបាល លោក គី សេរីវឌ្ឍន៍
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនពិគ្រោះយោបល់ (EMC) លោក ង៉ែត ជូ ពន្យល់ប្រហាក់ប្រហែលដែរថា បើសង្គ្រាមពាណិជ្ជកម្មពិភពលោកផ្ទុះឡើងមែន វិស័យទេសចរណ៍ និងកសិកម្ម ក៏រងផលប៉ះពាល់ដែរ ដោយថា កម្ពុជា បាននាំចេញ ទាំងសម្លៀកបំពាក់ ស្រូវអង្ករ ទៅសហរដ្ឋអាមេរិក សហភាពអឺរ៉ុប និងប្រទេសចិនផងដែរ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនពិគ្រោះយោបល់ (EMC) លោក ង៉ែត ជូ
តានតឹងរវាងអាមេរិកជាមួយនិងសហភាពអឺរ៉ុប និង កាណាដា បានកើតឡើងក្រោយពេលសហរដ្ឋអាមេរិកបានចេញសេចក្តីសម្រេចមួយដែលតម្រូវឲ្យមានការដំឡើងពន្ធនាំចូល ដែក និង អាលុយមីញ៉ូម ចូលទឹកដីអាមេរិក។ ទាំងអឺរ៉ុប និងកាណាដាបានប្រតិកម្មថាពួកគេនឹងសងសឹកអាមេរិកវិញ ដោយដំឡើងពន្ធលើទំនិញមួយចំនួនរបស់សហរដ្ឋអាមេរិកដែលនាំចូលប្រទេសទាំងនោះ។
ជាមួយគ្នានេះ សហរដ្ឋអាមេរិកក៏មានភាពតានតឹងផងដែរក្នុងរឿងពាណិជ្ជកម្មជាមួយចិន ហើយបានប្រកាសដាក់ទណ្ឌកម្មលើចិនដោយចោទថាចិនលួចចម្លងម៉ាកផលិតផលរបស់ខ្លួន។ ទណ្ឌកម្មនេះចាប់ផ្តើមអនុវត្តពីថ្ងៃទី៦ខែកក្កដា។ ជាការសងសឹកភ្លាមៗ ចិនបានប្រកាសដាក់ទណ្ឌកម្មលើសហរដ្ឋអាមេរិកវិញ ក្នុងការដំឡើងពន្ធលើទំនិញចំនួន៦៥៩ប្រភេទ ដែលមានទឹកប្រាក់៥០ពាន់លានដុល្លារដែរ។ កាលបរិច្ឆេទនៃការអនុវត្តទណ្ឌកម្មនេះក៏ចាប់ផ្តើមនៅថ្ងៃទី៦ខែកក្កដាដែរ៕
