ស្រីវ័យចំណាស់ម្នាក់នៅស្រុកមួយ ខេត្តបន្ទាយមានជ័យ អះអាងថា ទីផ្សារលក់ក្រមាខ្មែរ កំពុងតែមានការចាប់អារម្មណ៍ខ្លាំងពីអ្នកប្រើប្រាស់។
ស្រ្តីវ័យ ៧០ ឆ្នាំ ឈ្មោះ ឆុំ ម៉ៅ រស់នៅភូមិ ត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ អះអាងនៅថ្ងៃទី២៨ខែតុលានេះថា អ្នកស្រីប្រកបមុខរបរត្បាញក្រមាលក់រាល់ថ្ងៃ ដើម្បីរកប្រាក់ទ្រទ្រង់ជីវភាពគ្រួសារ ដោយថាចំណូលដែលបានមកពីការលក់នោះ ជួយឲ្យគ្រួសារគាត់មានជីវភាពធូធារ និងជួយកូនគាត់បានរៀនចប់ដល់ទៅបរិញ្ញាបត្រ៣ទៅ៤ នាក់ផងដែរ។
អ្នកស្រីយាយថា «នេះ ខ្ញុំលក់ដាច់ រាប់រយកំណាត់ [ក្រមា]។ ការត្បាញក្រមា បើប្រៀបធៀបពីមុនមកសព្វថ្ងៃ ពីមុនលក់យ៉ាកណាស់ តែសព្វថ្ងៃ ត្បាញបានលក់ដាច់ណាស់ឆ្នាំនេះ ។ ខ្ញុំដាក់ ១ កី រហូត ៧០កំណាត់»។
ស្រ្តីវ័យចំណាស់រូបនោះបញ្ជាក់ថា ក្រមាមួយតម្លៃមួយម៉ឺនរៀល ដោយថា បើអតិថិជនទិញច្រើន នឹងមានការចុះថ្លៃទៀតផង។
អ្វីដែលគួរឲ្យកត់សំគាល់ ស្រ្តីរូបនោះអះអាង បច្ចុប្បន្ននេះគាត់មានកូន៧នាក់ក្នុងបន្ទុក ហើយកូនទាំងនោះ គាត់ជាអ្នករកប្រាក់ផ្គត់ផ្គង់ឲ្យកូនបានសិក្សាទាំងអស់ តាមរយៈការប្រកបមុខរបរត្បាញក្រមាលក់ ៕
