កម្មករស្ត្រីធ្វើការងារផ្នែកសំណង់អះអាងថា ថៅកែរើសអើងស្ត្រី ដោយផ្តល់ប្រាក់ខែឲ្យទាបជាងកម្មករបុរស ដោយថាទោះជាការងារនោះប្រើកម្លាំងដូចបុរសក៏ដោយ។
ស្ត្រីវ័យ២៩ឆ្នាំ ឈ្មោះ ភ្លីញ លីនី រស់នៅភូមិពន្លៃ ឃុំពន្លៃ ស្រុកភ្នំស្រុក ខេត្តបន្ទាយមានជ័យ បានរៀបរាប់ប្រាក់វីអូឌី កាលពីថ្ងៃទី២០ ខែតុលា ឆ្នាំ២០១៨នេះថា ស្ត្រីកម្មករសំណង់មួយចំនួននៅតែរងការរើសអើងពីថៅកែ ទោះជាពួកគេប្រើកម្លាំងធ្វើការងាររៀបឥដ្ឋ បូកស៊ីម៉ង់លើជញ្ចាំងផ្ទះ ឬអាគារ ដូចបុរសក៏ដោយ។
ស្ត្រីរូបនោះបញ្ជាក់ថា គាត់ធ្វើការងារនេះបានប្រាក់ក្នុងមួយថ្ងៃ២៨០០០រៀល ចំណែកបុរសទទួលបាន៣២០០០រៀលក្នុងមួយថ្ងៃ ករណីនេះគាត់ថា ថៅកែរើសអើងស្ត្រីដែលប្រើកម្លាំងធ្វើការងារដូចបុរស។
ស្ត្រីរូបនោះថា៖ «បើប្រាក់ តម្លៃ ការងារ ទោះយ៉ាងណាក៏នៅទាបជាងប្រុសៗដែរ ទោះបីការងារដូចគ្នាមែន មេចជាគេនៅតែមិនឲ្យតម្លៃដូចគ្នា ចំពោះអ្នកដែលមានតួនាទី ការងារដូចគ្នា»។
ទោះជាយ៉ាងណា អ្នកនាង លីនី ប្តេជ្ញាថា នឹងរកការងារណាដែលប្រើកម្លាំងដូចបុរស ហើយទទួលបានប្រាក់ខែស្មើគ្នា ដោយមិនមានការរើសអើង ដើម្បីទទួលបានយុត្តិធម៌ជុំវិញបញ្ហានេះ៕