ក្រសួងរៀបចំដែនដី នគរូបនីយកម្ម និងសំណង់ បានស្នើទៅអាជ្ញាធរឲ្យចាត់វិធានផ្លូវច្បាប់លើប្រជាពលរដ្ឋមួយក្រុមដែលអះអាងថា កំពុងមានជម្លោះដីធ្លីជាមួយក្រុមហ៊ុន ហេង ហ៊ុយ នៅស្រុកស្រែអំបិល ខេត្តកោះកុង។
ប្រជាពលរដ្ឋប្រហែលជា១០០នាក់ ដែលអះអាងថា តំណាងឲ្យពលរដ្ឋ១៩៧គ្រួសារ មកពីឃុំជីខលើ និងជីខក្រោម ស្រុកស្រែអំបិល ខេត្តកោះកុង បានប្រមូលផ្តុំគ្នាតវ៉ាមុខក្រសួងរៀបចំដែនដីនៅព្រឹកថ្ងៃច័ន្ទនេះ ដើម្បីស្នើទៅក្រសួងជួយដោះស្រាយបញ្ហាជម្លោះដីធ្លីជាមួយក្រុមហ៊ុន ហេង ហ៊ុយ។
ក្នុងសេចក្តីប្រកាសព័ត៌មានរបស់ក្រសួងរៀបចំដែនដីចុះថ្ងៃទី១ ខែកក្តដា ដែល VOD ទទួលបាននៅរសៀលថ្ងៃច័ន្ទនេះ ក្រសួងរៀបចំដែនដី អះអាងថា ប្រជាពលរដ្ឋ៩៨៧គ្រួសារដែលមានវិវាទដីធ្លីពាក់ព័ន្ធដំណាំអំពៅផលិតស្ករសរនាំចេញ ស្ថិតក្នុងខេត្តកោះកុងនោះ គឺត្រូវបានដោះស្រាយចប់ជាស្ថាពរហើយ។
ក្នុងសេចក្តីប្រកាសព័ត៌មានដដែលនេះ ក្រសួងរៀបចំដែនដីបានច្រានចោលចំពោះពលរដ្ឋ១៩៧គ្រួសារ ដែលឡើងមកតវ៉ាដីធ្លីនៅក្រសួងថ្ងៃនេះ ដោយថា ពលរដ្ឋទាំង១៩៧គ្រួសារនេះមិនជាប់ពាក់ព័ន្ធនឹងករណីវិវាទដីធ្លី និងមិនទទួលដោះស្រាយឡើយ។ ក្រសួងមួយនេះ បានស្នើទៅអាជ្ញាធរពាក់ព័ន្ធចាត់វិធានការផ្លូវច្បាប់លើពលរដ្ឋទាំងនោះទៀតផង។
ពលរដ្ឋដែលឡើងមកតវ៉ានៅថ្ងៃនេះ បានបង្ហាញការខកចិត្តចំពោះសេចក្តីសម្រេចរបស់ក្រសួងរៀបចំដែនដី។
ពលរដ្ឋម្នាក់គឺ អ្នកស្រី ដេត ហួ ប្រាប់ វី.អូ.ឌី ក្រោយទទួលបានសេចក្តីប្រកាសរបស់ក្រសួងរៀបចំដែនដីថា វាជារឿងអយុត្តិធម៌បំផុតសម្រាប់ប្រជាពលរដ្ឋក្រីក្រមានជម្លោះដីធ្លីដូចពួកគាត់។ អ្នកស្រីថា អ្នកភូមិត្រូវបានក្រុមហ៊ុនរំលោភយកដីធ្លី និងមិនដោះស្រាយ ហើយត្រូវក្រសួងបដិសេធមិនទទួលស្គាល់រួមទាំងជំរុញឲ្យសមត្ថកិច្ចចាត់វិធានការផ្លូវច្បាប់លើពួកគាត់ទៀត។
អ្នកស្រីបន្ថែមថា៖ «ពួកខ្ញុំអត់យល់ព្រមទេ វាអយុត្តិធម៌សម្រាប់ពួកខ្ញុំណាស់ ព្រោះក្រសួងមិនដែលបានដោះស្រាយអីឲ្យពួកខ្ញុំទេ ហើយ ហេង ហ៊ុយ រំលោភយកដីបងប្អូនពួកខ្ញុំទាំងអស់គ្នាមិនដែលទទួលបានការដោះស្រាយទេ ហេតុអីបានជាក្រសួងធ្វើដាក់ពួកខ្ញុំអញ្ចឹង។ ពួកខ្ញុំមិនបោះបង់ការតវ៉ាចោលទេ បីថ្ងៃក្រោយបើគាត់មិនផ្តល់ឲ្យព័ត៌មានឲ្យច្បាស់ដល់ពួកខ្ញុំទេ ពួកខ្ញុំនឹងឡើងតវ៉ាដល់ក្រសួងម្តងទៀត»។
ពលរដ្ឋម្នាក់ទៀត គឺអ្នកស្រី អិត តឹង ប្រាប់ វី.អូឌី កន្លែងតវ៉ាថា អ្នកភូមិខ្លះបានទៅរស់នៅលើតំបន់មានជម្លោះនោះតាំងពីឆ្នាំ១៩៧៩ រហូតមកឆ្នាំ២០០៧ គឺអាជ្ញាធរមិនបានចេញប័ណ្ណកម្មសិទ្ធិឲ្យពលរដ្ឋនោះទេ ប៉ុន្តែ សម្រាប់ក្រុមហ៊ុន ហេង ហ៊ុយ ដែលមកអភិវឌ្ឍក្រោយបែរជាមានប័ណ្ណកម្មសិទ្ធិទៅវិញ។
អ្នកស្រីបន្ថែមថា៖ «ពួកខ្ញុំសម្រេចឡើងតវ៉ាដល់ក្រសួងរៀបចំដែនដីនេះ ដោយសារពួកខ្ញុំមានការឈឺចាប់ពេក ហើយជីវភាពគ្រួសារពួកខ្ញុំក៏ខ្វះខាតជួបការលំបាកដោយសារបាត់បង់មុខរបពុំមានដីបង្កបង្កើនផល ដោយសារក្រុមហ៊ុន ហេង ហ៊ុយ រំលោភយក និងឈូសឆាយដំណាំអស់ជាយូរឆ្នាំហើយ»។
អភិបាលរងខេត្តកោះកុង លោក សុខ សុធី មានប្រសាសន៍ថា ករណីជម្លោះដីធ្លីរវាងពលរដ្ឋ និងក្រុមហ៊ុន ហេង ហ៊ុយ អេគ្រីខាល់ឈ័រគ្រុប នេះ គឺអាជ្ញាធរខេត្តចុះស្រាវជ្រាវរួចហើយ ដោយរកឃើញថា ដីក្រុមហ៊ុនមួយនេះមានប័ណ្ណកម្មសិទ្ធត្រឹមត្រូវដែលហួសពីដែនសមត្ថកិច្ចរបស់អាជ្ញាធរក្នុងការដោះស្រាយ។
លោកបន្ថែមថា៖ «ដីរបស់លោក ហេង ហ៊ុយ ហ្នឹងគាត់មានប្លង់ត្រឹមត្រូវទាំងអស់ និងមាន ស.ជ.ណ ពីគណៈរដ្ឋមន្រ្តីទាំងអស់ ក្រោយគណៈរដ្ឋមន្រ្តីឲ្យគាត់ដោះស្រាយប៉ះពាល់អស់ ក៏គេចេញប្លង់ឲ្យគាត់។ អញ្ចឹង អាចថ្ងៃអាជ្ញាធរខេត្តនឹងជូនដំណឹងទៅភាគីពាក់ព័ន្ធឲ្យទៅដោះស្រាយតាមផ្លូវតុលាការ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន បានបង្ហាញការខកចិត្តដែរចំពោះក្រសួងរៀបចំដែនដី ដែលប្រកាសមិនទទួលស្គាល់ពលរដ្ឋ១៩៧គ្រួសារ និងស្នើឲ្យមានការចាត់វិធានការផ្លូវច្បាប់នោះ។
មន្រ្តីការងារសិទ្ធិមនុស្សរូបនេះ បានស្នើទៅក្រសួងត្រូវសិក្សាស្រាវជ្រាវឲ្យបានច្បាស់លាស់មុនចេញសេចក្តីប្រកាសឲ្យចាត់វិធានការលើពលរដ្ឋបែបនេះ ដោយថា ដើម្បីចៀសវាងការគំរាមកំហែង និងរំលោភសិទ្ធិពលរដ្ឋ។
លោក ហ៊ួរ អ៊ីន អះអាងថា កន្លងមក ក្រសួងបានដោះស្រាយបញ្ចប់ជម្លោះដីធ្លីជូនពលរដ្ឋ៩៨៧គ្រួសារជាមួយក្រុមហ៊ុនស្ករអំពៅចំនួន២ដែលមានជនជាតិថៃជាម្ចាស់វិនិយោគ ហើយលោក លី យ៉ុង ផាត់ ជាម្ចាស់ ប៉ុន្តែ មិនបានដោះស្រាយវិវាទដីធ្លីជូនពលរដ្ឋ១៩៧គ្រួសារ ដែលកំពុងមានជម្លោះជាមួយក្រុមហ៊ុនរបស់លោក ហេង ហ៊ុយ នោះទេ។
លោកបន្ថែមថា៖ « អីចឹង យើងករណីពីរហ្នឹងវាខុសគ្នាជាមួយករណីដែលក្រសួងបានដោះស្រាយចប់ អញ្ចឹងក្រសួងគួរតែធ្វើការសិក្សាស្រាវជ្រាវឲ្យបានច្បាស់លាស់សិន កុំទាន់ប្រញាប់ចេញសេចក្តីថ្លែងការណ៍ឲ្យមានចំណាត់ការទៅលើពលរដ្ឋ ថាតើពលរដ្ឋបានប្រព្រឹត្តអីខុស? អីចឹងពួកគាត់ពិតជាប្រឈមហើយពីការមានបណ្តឹងពីតុលាការ ហើយពួក(គាត់)ក៏ប្រឈមនឹងការជាប់ឃុំដែរ ប្រសិនជាពុំមានការស៊ើបអង្កេតច្បាស់លាស់ ហើយនឹងការគំរាមកំហែងផ្សេងៗទៀត»។
វី.អូ.ឌី មិនសុំការឆ្លើយតបពីតំណាងក្រុមហ៊ុន ហេង ហ៊ុយ អេគ្រីខាល់ឈ័រគ្រុប បានទេជំវិញបញ្ហាមួយនេះ។
យោងតាមញត្តិរបស់ប្រជាពលរដ្ឋដាក់ទៅក្រសួងរៀបចំដែនដីបញ្ជាក់ថា ប្រជាពលរដ្ឋចំនួន១៩៧គ្រួសារ កំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អេគ្រីខាល់ឈ័រគ្រុប ចាប់តាំងពីឆ្នាំ២០០៧មក។ ក្នុងញត្តិនេះ បានបញ្ជាក់ថា ដីដែលមានជម្លោះនោះមានទីតាំងស្ថិតនៅភូមិតានី ភូមិជីខ ភូមិឈូក ក្នុងឃុំជីខលើ និងដីក្នុងភូមិចំបក់ ស្ថិតនៅក្នុងឃុំជីខក្រោម។
ក្នុងញត្តិដដែលនេះ ប្រជាពលរដ្ឋបានស្នើសុំឆ្វៀលកាត់ដីទំហំ៤២១ហិកតា ចេញពីដីទីតាំងអនុវត្តគម្រោងរបស់ក្រុមហ៊ុន ហេង ហ៊ុយ ដោយប្រគល់ឲ្យមកប្រជាពលរដ្ឋធ្វើជាកម្មសិទ្ធិវិញ។ ប្រជាពលរដ្ឋក៏ទាមទាសំណងចំនួន៧០០០ដុល្លារ ក្នុងមួយគ្រួសារផងដែរ៕