យោងតាមសេចក្តីជូនដំណឹងរបស់ក្រសួងពាណិជ្ជកម្មឲ្យដឹងនៅថ្ងៃច័ន្ទនេះថា លោកនាយករដ្ឋមន្រ្តី ហ៊ុន សែន បានសម្រេចបញ្ចុះតម្លៃប្រេងឥន្ធនៈចំនួន៤សេនដុល្លារបន្ថែមទៀតសម្រាប់តម្លៃប្រេងឥន្ធនៈលក់រាយនៅក្នុងប្រទេសកម្ពុជា។
សេចក្តីជូនដំណឹងរបស់ក្រសួងពាណិជ្ជកម្មចេញនៅថ្ងៃច័ន្ទ ទី១ ខែកក្កដានេះ បញ្ជាក់ថា ផ្អែកតាមតម្លៃមធ្យមប្រេងឥន្ធនៈលើទីផ្សារអន្តរជាតិ ថ្លៃលក់រាយប្រេងឥន្ធនៈពីថ្ងៃទី១ ដល់ថ្ងៃទី១៥ ខែកក្កដា នឹងត្រូវលក់ ៣៧៦០រៀលក្នុងមួយលីត្រសម្រាប់សាំងធម្មតា EA92 និង ៣៦៧៣រៀលក្នុងមួយលីត្រសម្រាប់ប្រេងម៉ាស៊ូត។
តាមរយៈសេចក្តីជូនដំណឹងដដែលនេះ ក្រសួងពាណិជ្ជកម្មបញ្ជាក់ថា ដូច្នេះថ្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី០១ ដល់ថ្ងៃទី១៥ ខែកក្កដា នឹងចុះមក ៣៦០០រៀលក្នុងមួយលីត្រសម្រាប់សាំងធម្មតា EA92 និង ៣៥០០រៀលក្នុងមួយលីត្រសម្រាប់ប្រេងម៉ាស៊ូត។
យោងតាមប្រកាសអន្តរក្រសួងរបស់ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងរ៉ែ និងថាមពល ចុះថ្ងៃទី៩ ខែមីនា ឲ្យដឹងថា នាយកដ្ឋានអភិវឌ្ឍន៍វិស័យឯកជននៃក្រសួងពាណិជ្ជកម្ម នឹងគណនារកថ្លៃលក់រាយប្រេងឥន្ធនៈនៅកម្ពុជាតាមរូបមន្តដែលក្រសួងបានកំណត់ និងចេញតម្លៃលក់រាយនោះជូនក្រុមហ៊ុនប្រេងឥន្ធនៈ៣ដងក្នុង១ខែ គឺនៅថ្ងៃទី១ ថ្ងៃទី១១ និងថ្ងៃទី២១ នៃខែនីមួយៗ។
ប្រកាសអន្តរក្រសួងបន្តថា គ្រប់ស្ថានីយលក់រាយប្រេងឥន្ធនៈទាំងអស់ដែលលក់ប្រេងម៉ាស៊ូត ប្រេងសាំងធម្មតា និងប្រេងសាំងស៊ូពែ ត្រូវលក់តាមតម្លៃដែលក្រសួងបានកំណត់ ឬក្នុងតម្លៃប្រកួតប្រជែងមួយទាបជាងតម្លៃនោះ៕