លោកនាយករដ្ឋមន្រ្ដី ហ៊ុន សែន បានប្រាប់ឲ្យសហគមន៍អន្ដរជាតិពិចារណាឲ្យច្បាស់ មុននឹងសម្រេចដកភាពអនុគ្រោះណាមួយពីប្រទេសក្រីក្រ ឬមានការអភិវឌ្ឍតិចតួច ដោយថា វាជាការដើរផ្ទុយពីគោលការណ៍របស់អង្គការសហប្រជាជាតិ ដែលចង់ជួយឲ្យប្រទេសទាំងនោះចាកផុតពីឋានៈជាប្រទេសមានភាពក្រីក្រ។
លោក ហ៊ុន សែន បានថ្លែងដូច្នេះនៅក្នុងកិច្ចប្រជុំស្ដីពី «ការត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្ម ឆ្នាំ២០១៩» នៅអង្គការពាណិជ្ជកម្មពិភពលោក នៅឯទីក្រុងហ្សឺណែវ ប្រទេសស្វីស ដែលធ្វើឡើងចាប់ពីថ្ងៃទី៣ ដល់ថ្ងៃទី៥ ខែកក្កដានេះ។
ក្នុងកិច្ចប្រជុំនេះ លោក ហ៊ុន សែន ថ្លែងថា ការព្រមានដកហូតភាពអនុគ្រោះណាមួយពីប្រទេសមានការអភិវឌ្ឍតិចតួច ដែលក្នុងនោះរួមទាំងកម្ពុជាផងនោះ គឺផ្ទុយទៅនឹងគោលការណ៍របស់អង្គការសហប្រជាជាតិ គោលការណ៍អភិវឌ្ឍប្រកបដោយចីរភាព និងមិនអាចជួយឲ្យប្រទេសទាំងនោះរួចផុតពីឋានៈជាប្រទេសដែលមានភាពក្រីក្រនោះឡើយ។
លោក ហ៊ុន សែន ថ្លែងបន្ដថា៖ «ហើយសុំពិចារណាឲ្យបានដិតដល់មុននឹងដាក់វិធានការព្យួរ ឬដកចេញនូវភាពអនុគ្រោះពីប្រទេសអភិវឌ្ឍតិចតួច ព្រោះការព្យួរ ឬការដកនេះ នឹងធ្វើឲ្យប្រទេសទាំងនោះមិនអាចជួយពិភពលោកឲ្យសម្រេចបាននូវគោលដៅអភិវឌ្ឍប្រកបដោយចីរភាព និងមិនអាចជួយពួកគេឲ្យចាកចេញពីឋានៈជាប្រទេសមានការអភិវឌ្ឍតិចតួចបានឡើយ ដែលចលនានេះគឺជាដំណើរផ្ទុយទាំងស្រុងពីគោលការណ៍របស់អង្គការសហប្រជាជាតិ និងអង្គការពាណិជ្ជកម្មពិភពលោក»។
ទោះជាយ៉ាងណាក៏ដោយ កម្ពុជាត្រូវបានគេមើលឃើញថា កំពុងទទួលរងការព្រមានដាក់ទណ្ឌកម្មផ្នែកសេដ្ឋកិច្ចពីសហភាពអឺរ៉ុប និងការព្រមានសើរើប្រព័ន្ធអនុគ្រោះពន្ធ GSP របស់អាមេរិក ក្រោយមានចោទប្រកាន់ថា រដ្ឋាភិបាលកម្ពុជាបានរំលោភសិទ្ធិមនុស្ស និងធ្វើឲ្យលទ្ធិប្រជាធិបតេយ្យធ្លាក់ចុះធ្ងន់ធ្ងរ ក្រោយបញ្ចប់ការបោះឆ្នោតដ៏ចម្រូងចម្រាសមួយ។
កាលពីថ្ងៃទី១១ ខែកុម្ភៈ ឆ្នាំ២០១៩នេះ សហភាពអឺរ៉ុបបានប្រកាសអំពីការចាប់ផ្ដើមដំណើរការនីតិវិធីដែលនឹងឈានទៅរកការព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនីតិរដ្ឋ នៅក្នុងរយៈពេល ១៨ខែចុងក្រោយមកនេះ។
តាមការគ្រោងទុក ដំណើរបេសកម្មរបស់គណៈប្រតិភូជាន់ខ្ពស់របស់សហភាពអឺរ៉ុប ដែលចុះមកឃ្លាំមើល និងត្រួតពិនិត្យបញ្ហាសិទ្ធិមនុស្សនៅកម្ពុជា នឹងបញ្ចប់ទៅនៅពាក់កណ្ដាលខែសីហាខាងមុខនេះ។
ក្រោយចប់រយៈពេលនេះ សហភាពអឺរ៉ុបនឹងបង្ហាញរបាយការណ៍រកឃើញរបស់ខ្លួនពាក់ព័ន្ធនឹងបញ្ហាសិទ្ធិមនុស្សនៅកម្ពុជា ហើយរដ្ឋាភិបាលកម្ពុជា មានរយៈពេល ១ខែ ការក្នុងឆ្លើយតបនឹងរបាយការណ៍នេះ មុននឹងមានការសម្រេចជាផ្លូវការ ថាតើប្រព័ន្ធអនុគ្រោះពន្ធ EBA ត្រូវព្យួរ ឬរក្សាទុកដដែលសម្រាប់កម្ពុជា៕
