រដ្ឋសភាប្រកាសថា ក្នុងកិច្ចប្រជុំពេញអង្គនៅថ្ងៃព្រហស្បតិ៍ស្អែកនេះ មានរបៀបវារៈមួយសួរក្រសួងយុត្តិធម៌ពីប្រសិទ្ធភាពអនុវត្តច្បាប់ និងពង្រឹងសមត្ថភាពរបស់មន្ត្រី។
សេចក្តីប្រកាសព័ត៌មានចុះថ្ងៃទី៣ ខែកក្កដានេះ រដ្ឋសភាអះអាងថា អង្គប្រជុំបានអនុម័តកំណត់កាលបរិច្ឆេទបន្តសម័យប្រជុំរដ្ឋសភាលើកទី២ នីតិកាលទី៥ នៅព្រឹកថ្ងៃព្រហស្បតិ៍ នឹងមានចោទសំនួរទៅរដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍានា ។
អ្នកនាំពាក្យរដ្ឋសភា លោក ឡេង ប៉េងឡុង ឱ្យ VOD ដឹងបន្ថែមថា សមាជិកសភានឹងសួរលោក អង្គវង្ស វឌ្ឍានា ពីការពង្រឹងសមត្ថភាពមន្ត្រីលើការអនុវត្តច្បាប់ និងបញ្ហាមួយចំនួនទៀតពាក់ព័ន្ធទៅនឹងតួនាទីរបស់ក្រសួងមួយនេះ។
លោក ឡេង ប៉េងឡុង៖ «ការងាររបស់ក្រសួងយុត្តិធម៌ហ្នឹង ដូចជា ការរៀបចំតុលាការ ការងារលើកកម្ពស់ការអនុវត្តច្បាប់ ការងារពង្រឹងសមត្ថភាពមន្ត្រី។ ខ្ញុំមិនដឹងថា គាត់រកឃើញយ៉ាងម៉េចដែរ ចាំដល់ថ្ងៃហ្នឹង [ប្រជុំ] គាត់សួរស្អីខ្លះដឹងហើយ»។
នេះជាលើកទី១ហើយដែលសភាឯកបក្សរបស់គណបក្សប្រជាជនកម្ពុជា បានកោះហៅមន្ត្រីរដ្ឋាភិបាលមកសាកសួរ ពីដំណើរឃ្លាំមើលរបស់ខ្លួនក្រោយពីសមាជិកសភាទាំងអស់ចំនួន១២៥រូប ចូលកាន់តំណែងក្រោយការបោះឆ្នោតឆ្នាំ២០១៨មក។