ប្រជាពលរដ្ឋប្រហែលជាង១០០នាក់ ដែលអះអាងថា កំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អេគ្រីខាល់ឈ័រគ្រុប ក្នុងស្រុកស្រែអំបិល ខេត្តកោះកុង បានផ្ទុះការតវ៉ាជាថ្មី បន្ទាប់ពីក្រសួងរៀបចំដែនដីប្រកាសមិនទទួលសំណើ និងជំរុញទៅអាជ្ញាធរឲ្យចាត់វិធានការផ្លូវច្បាប់លើពួកគេ។
កាលពីថ្ងៃចន្ទដើមសបា្តហ៍នេះ ពលរដ្ឋជាង១០០នាក់ ដែលអះអាងថា តំណាងឲ្យពលរដ្ឋ១៩៧គ្រួសារ មកពីឃុំជីខលើ និងជីខក្រោម បានមកតវ៉ាមុខក្រសួងរៀបចំដែន នគរូបនីយកម្ម និងសំណង់ ម្តងរួចមកហើយ ដើម្បីស្នើសុំក្រសួងជួយដោះស្រាយបញ្ហាជម្លោះដីធ្លីជាមួយក្រុមហ៊ុន ហេង ហ៊ុយ។ ប៉ុន្តែ ក្រោយក្រុមពលរដ្ឋត្រឡប់ទៅផ្ទះវិញ ក្រសួងបានចេញសេចក្តីប្រកាសព័ត៌មានមួយច្រានចោលពលរដ្ឋ១៩៧គ្រួសារនេះ ដោយថា ពលរដ្ឋទាំងនោះមិនជាប់ពាក់ព័ន្ធនឹងករណីវិវាទដីធ្លីដែលត្រូវដោះស្រាយឡើយ។
ពលរដ្ឋម្នាក់គឺ អ្នកស្រី ដេត ហួ ដែលអះអាងថា ជាតំណាងពលរដ្ឋប្រាប់ វី.អូ.ឌី នៅកន្លែងតវ៉ាមុខក្រសួងរៀបចំដែនដីនៅថ្ងៃនេះថា អ្នកភូមិមានការខកចិត្ត និងឈឺចាប់ ដែលពួកគាត់ត្រូវបានក្រុមហ៊ុនរំលោភយកដីធ្លីហើយ បែរជាក្រសួងប្រកាសមិនដោះស្រាយ និងជំរុញឲ្យចាត់វិធានការផ្លូវច្បាប់ទៀតនោះ។
អ្នកស្រីបន្ថែមថា៖ «ក្រសួងគាត់អត់បានស្តាប់ហេតុផលរបស់ពួកខ្ញុំទេ ហេតុអីបានជាគាត់ធ្វើអីចឹង? ការធ្វើអីចឹង វាអយុត្តិធម៌សម្រាប់ពួកខ្ញុំពេកហើយ អត់មានអាណិតពួកខ្ញុំទេ ប្រជាពលរដ្ឋពួកខ្ញុំបាត់បង់ដីធ្លីពិតមែន ហេតុអីបានជាគាត់មិនដោះស្រាយឲ្យ? ពួកខ្ញុំមិនត្រូវបានគេដោះស្រាយឲ្យទេ។ គេដោះស្រាយឲ្យតែអ្នករងប៉ះពាល់ជាមួយលោក លី យ៉ុងផាត់ ទេ ខាង ហេង ហ៊ុយ មិនបានដោះស្រាយទេ»។
ពលរដ្ឋម្នាក់ គឺអ្នកស្រី អិត តឹង និយាយថា ចាប់តាំងពីមានជម្លោះដីធ្លីជាមួយក្រុមហ៊ុន ហេង ហ៊ុយ កាលពីឆ្នាំ២០០៧មក អ្នកភូមិពុំមានដីស្រែចម្ការសម្រាប់បង្កបង្កើនផលនោះទេ ដែលបណ្តាលឲ្យអ្នកភូមិមួយចំនួនធ្លាក់ខ្លួនក្រីក្រ ហើយកូនៗត្រូវបាត់បង់ការសិក្សា និងចំណាកស្រុកទៅធ្វើការងារប្រទេសថៃ ជាដើម។
អ្នកស្រី អិត តឹង៖ «ផលដំណាំរបស់ពួកខ្ញុំមានស្វាយ ចន្ទី ពោត សណ្តែក ស្រូវ និងមានច្រើនទៀត ក្រុមហ៊ុនឈូសឆាយចោលអស់ ឥឡូវពួកខ្ញុំបាត់បង់មុខរបរ រកមួយថ្ងៃស៊ីមួយថ្ងៃ ពួកខ្ញុំគ្មានដីធ្វើស្រែចំការទេ សួរថា ពួកខ្ញុំឈឺចាប់ប៉ុណ្ណា?»។
ខណៈក្រុមពលរដ្ឋប្រមូលផ្ដុំគ្នានៅមុខខ្លោងទ្វារទីស្តីការក្រសួងរៀបចំដែនដីប្រហែលម៉ោង៩ព្រឹកនេះ គឺអនុប្រធានរដ្ឋបាលនៃក្រសួងរៀបចំដែនដី លោក អុស សុខយស បានចុះមកជួប ហើយសន្យាជួយរកដំណោះស្រាយ។
វីអូឌី បានព្យាយាមសុំការបញ្ជាក់បន្ថែមពីអ្នកនាំពាក្យក្រសួងរៀបចំដែន នគរូបនីយកម្ម និងសំណង់ លោក សេង ឡូត ប៉ុន្តែ លោកបដិសេធមិនធ្វើអត្ថាធិប្បាយ ដោយថា លោកកំពុងជាប់រវល់ប្រជុំ។
ក្រសួងរៀបចំដែនដី បានប្រកាសកាលពីថ្ងៃទី១ ខែកក្កដា ថា ក្រសួងបានដោះស្រាយផលប៉ះពាល់ជូនប្រជាពលរដ្ឋ ៩៨៧គ្រួសារដែលមានវិវាទដីធ្លីពាក់ព័ន្ធដំណាំអំពៅផលិតស្ករសរនាំចេញ ស្ថិតក្នុងខេត្តកោះកុងនោះ ចប់ជាស្ថាពរយូរហើយ។ ក្រសួងក៏បានបានបដិសេធចំពោះពលរដ្ឋ ១៩៧គ្រួសារដែលឡើងមកតវ៉ានេះ ដោយថា ពលរដ្ឋទាំងនោះមិនជាប់ពាក់ព័ន្ធនឹងករណីវិវាទដីធ្លីនោះទេ។
ក្នុងលិខិតរបស់រដ្ឋបាលខេត្តកោះកុងចុះថ្ងៃទី១ ខែកក្កដា ផ្ញើជូនក្រុមពលរដ្ឋ ១៩៧គ្រួសារ គឺអភិបាលរងខេត្ត លោក សុខ សុទ្ធី ប្រាប់ពលរដ្ឋថា បញ្ហាជម្លោះដីធ្លីរវាងពលរដ្ឋ ១៩៧គ្រួសារជាមួយក្រុមហ៊ុន ហេង ហ៊ុយ អេគ្រីខាល់ឈ័រគ្រុប ក្នុងស្រុកស្រែអំបិល ខេត្តកោះកុង ហើយពលរដ្ឋសុំកាត់ឆ្វៀលដី ៤២១ហិកតានោះ គឺស្ថិតនៅលើដីមានប័ណ្ណកម្មសិទ្ធរួចទៅហើយ ដែលកាន់កាប់ដោយម្ចាស់ក្រុមហ៊ុន ហេង ហ៊ុយ។
ក្នុងលិខិតដដែលនេះលោក សុខ សុទ្ធី បញ្ជាក់ប្រាប់ពលរដ្ឋថា វាហួសពីដែនសមត្ថកិច្ចរបស់អាជ្ញាធរខេត្តក្នុងការដោះស្រាយ ដោយថា ការដោះស្រាយបញ្ហានេះ គឺជាសមត្ថកិច្ចរបស់ស្ថាប័នតុលាការ។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន បានស្នើទៅក្រសួងរៀបចំដែនដីឲ្យពិចារណាឡើងវិញ និងត្រូវសិក្សាស្រាវជ្រាវឲ្យបានច្បាស់លាស់លើករណីនេះ មុនបដិសេធ។
លោក សុខ សុទ្ធី៖ «ពីព្រោះថា ទំនាស់នេះកើតឡើងដោយសាររដ្ឋាភិបាលផ្តល់ដីសម្បទានសេដ្ឋកិច្ចទៅឲ្យក្រុមហ៊ុន។ អីចឹង ត្រូវសិក្សាឲ្យបានច្បាស់លាស់ ថាតើប្រជាពលរដ្ឋទាំងនោះទទួលបានសំណងដែរក៏អត់ពីមុនមកនោះ? ហើយប្រសិនបើទទួលបានសំណង តើសំណងទទួលបានដោយការព្រមព្រៀង ឬក៏សំណងនោះទទួលបានដោយការបង្ខំ ការគំរាមណាមួយ? ដោយសារតែពួកគាត់ជាជនរងគ្រោះដូចគ្នា អីចឹង សំណងត្រូវតែទទួលបានសមរម្យដូចគ្នាដូចប្រជាពលរដ្ឋដែលបានសំណងកន្លងមកនោះ»។
លោក ហ៊ួរ អ៊ីន អះអាងថា កន្លងមក ក្រសួងបានដោះស្រាយបញ្ចប់ជម្លោះដីធ្លីជូនពលរដ្ឋ ៩៨៧គ្រួសារជាមួយក្រុមហ៊ុនស្ករអំពៅចំនួន២ ដែលមានជនជាតិថៃជាអ្នកវិនិយោគ ហើយលោក លី យ៉ុង ផាត់ ជាម្ចាស់ ប៉ុន្តែ មិនបានដោះស្រាយវិវាទដីធ្លីជូនពលរដ្ឋ ១៩៧គ្រួសារ ដែលកំពុងមានជម្លោះជាមួយក្រុមហ៊ុនរបស់លោក ហេង ហ៊ុយ នោះទេ។
យោងតាមញត្តិរបស់ប្រជាពលរដ្ឋដាក់ទៅក្រសួងរៀបចំដែនដីបញ្ជាក់ថា ប្រជាពលរដ្ឋចំនួន ១៩៧គ្រួសារ កំពុងមានជម្លោះដីធ្លីជាមួយក្រុមហ៊ុន ហេង ហ៊ុយ អេគ្រីខាល់ឈ័រគ្រុប ចាប់តាំងពីឆ្នាំ២០០៧មក។ ក្នុងញត្តិនេះ បានបញ្ជាក់ថា ដីដែលមានជម្លោះនោះមានទីតាំងស្ថិតនៅភូមិតានី ភូមិជីខ ភូមិឈូក ក្នុងឃុំជីខលើ និងដីក្នុងភូមិចំបក់ ស្ថិតនៅក្នុងឃុំជីខក្រោម។
ក្នុងញត្តិដដែលនេះ ប្រជាពលរដ្ឋបានស្នើសុំឆ្វៀលកាត់ដីទំហំ ៤២១ហិកតា ចេញពីដីទីតាំងអនុវត្តគម្រោងរបស់ក្រុមហ៊ុន ហេង ហ៊ុយ ដោយប្រគល់ឲ្យមកប្រជាពលរដ្ឋធ្វើជាកម្មសិទ្ធិវិញ។ ប្រជាពលរដ្ឋក៏ទាមទារសំណងចំនួន ៧០០០ដុល្លារ ក្នុងមួយគ្រួសារផងដែរ៕
