សាលារាជធានីភ្នំពេញ មិនអនុញ្ញាតឱ្យយុវជន១០នាក់មកពីសមាគមសម្ព័ន្ធនិស្សិតបញ្ញវន្តខ្មែរ ធ្វើពិធីបែបសាសនាគម្រប់ខួប៣ឆ្នាំ នៅទីតាំងបាញ់សម្លាប់លោក កែម ឡី នោះឡើយ។
លិខិតចុះថ្ងៃទី៤ ខែកក្កដា សាលារាជធានីលើកឡើងថា ការមិនអនុញ្ញាតនេះ ដោយសារទីតាំងនោះស្ថិតក្រោមការគ្រប់គ្រងរបស់ឯកជន។
សាលារាជធានីភ្នំពេញ តម្រូវឱ្យក្រុមយុវជនដែលបានស្នើសុំទៅធ្វើពិធីនេះនៅផ្ទះគ្រួសារសព ឬនៅស្នាក់ការរបស់ខ្លួនវិញ។
កាលពីថ្ងៃទី១ ខែកក្កដា សមាគមសម្ព័ន្ធនិស្សិតបញ្ញវន្តខ្មែរ បានដាក់លិខិតទៅសាលារាជធានីភ្នំពេញ ដោយស្នើសុំជួបជុំគ្នាចំនួន១០នាក់ ដាក់កម្រងផ្កាជូនវិញ្ញាណក្ខន្ធលោក កែម ឡី នៅស្ថានីយ៍ប្រេងឥន្ធនៈកាល់តិច ជាប់ស្តុបបូកគោនៅថ្ងៃទី១០ ខែកក្កដា ឆ្នាំ២០១៩ នាវេលាម៉ោង៩ព្រឹក នឹងបញ្ចប់វិញនៅម៉ោង១១។
លោក កែម ឡី ត្រូវខ្មាន់កាំភ្លើងបាញ់សម្លាប់នៅក្នុងស្តាម៉ាត ស្ថិតក្នុងស្ថានីយ៍ប្រេងឥន្ធនៈកាល់តិច ជាប់នឹងស្តុបបូកគោ កាលថ្ងៃទី១០ ខែកក្កដា ឆ្នាំ២០១៦ ក្រោយពីលោកវិភាគបន្ថែមលើរបាយការណ៍ស៊ើបអង្កេតរបស់អង្គការអន្តរជាតិ GlobalWitness ដែលលាតត្រដាងពីការក្តោបក្តាប់មុខជំនួញរបស់គ្រួសារ«ត្រកូលហ៊ុន»។
បច្ចុប្បន្ន អាជ្ញាធរចាប់ខ្លួនបុរសម្នាក់ប៉ុណ្ណោះ ឈ្មោះ អឿត អាង ហៅ «ជួបសម្លាប់» ដោយកាត់ទោសឱ្យជាប់ពន្ធនាគារមួយជីវិត។
ការបាញ់សម្លាប់លោក កែម ឡី ស្ថិតក្នុងភាពចម្រូងចម្រាស ដែលអតីតមេដឹកនាំបក្សប្រឆាំង លោក សម រង្ស៊ី ចោទរដ្ឋាភិបាលថា ជាអ្នកនៅពីក្រោយឃាតកម្មនេះ។ ប៉ុន្តែ នាយករដ្ឋមន្ត្រីតាមរយៈមេធាវី បានដាក់ពាក្យប្តឹងលោក សម រង្ស៊ី ចំពោះការចោទនេះ ហើយទីបំផុតតុលាការបានកាត់ក្ដីឱ្យលោកនាយករដ្ឋមន្ត្រីជាអ្នកឈ្នះក្ដី៕