ក្រុមមន្ត្រីជាន់ខ្ពស់កម្ពុជា បដិសេធចោលនូវព័ត៌មានផ្សព្វផ្សាយលើបណ្ដាញសង្គម ដែលសង្ស័យអំពីការឆ្លងវីរុសកូរ៉ូណាថ្មីមួយករណីទៀត បន្ទាប់ពីបុរសបរទេសម្នាក់ បានដួលសន្លប់នៅក្នុងអាកាសយានដ្ឋានអន្តរជាតិភ្នំពេញនៅព្រឹកថ្ងៃនេះ។
អ្នកនាំពាក្យអាកាសចរណ៍ស៊ីវិលកម្ពុជា លោក ជា អូន បានទទួលស្គាល់ថា ពិតជាមានករណីបុរសបរទេសដួលសន្លប់នៅក្នុងអាកាសយានដ្ឋានអន្តរជាតិភ្នំពេញមែន។
មន្ត្រីនាំពាក្យរូបនេះ បានឱ្យដឹងថា ជនបរទេសរូបនោះ គឺជាជនជាតិយែមែនដែលត្រូវធ្វើដំណើរចាកចេញពីប្រទេសកម្ពុជាទៅកាន់ប្រទេសម៉ាឡេស៊ី។
លោក ជា អូន ប្រាប់ថា៖ «របៀបគាត់ស្រវឹងពីល្ងាចទេ។ ដល់ស្រវឹងពេកទៅ អាឡេអាឡឺសន្លប់ទៅ។ វាមិនមែនឈឺស្អីផ្អើលពេញហ្នឹងអ៊ីចឹងទេ»។
លោកវេជ្ជបណ្ឌិត លី សូវ៉ាន់ បានច្រានចោលនូវមន្ទិលសង្ស័យលើបុរសជាជនបរទេសរូបនោះផងដែរ ដោយលោកថា គាត់ខ្វះអុកស៊ីហ្សែន។
លោក លី សូវ៉ាន់ មានប្រសាសន៍ថា៖ «ករណីដួលនោះ អត់ពាក់ព័ន្ធអីនឹងរោគកូរ៉ូណាហ្នឹងទេ។ អ្នកដំណើរម្នាក់នោះ គាត់ខ្វះអុកស៊ីហ្សែន ហើយក៏ដួលសន្លប់។ ក្រោយពេលសង្គ្រោះដាក់អុកស៊ីហ្សែនទៅ គាត់ធូរហើយ ក៏ឡើងយន្តហោះទៅស្រុកគាត់រួចហើយដែរ»។
កម្ពុជាបានប្រកាសអំពីការឆ្លងវីរុសកូរ៉ូណាប្រភេទថ្មីជាលើកដំបូងនៅខេត្តព្រះសីហនុកាលពីចុងខែមករាកន្លងមក បន្ទាប់ពីបានរកឃើញករណីឆ្លងវីរុសនោះ កើតមានលើបុរសជនជាតិម្នាក់ ដែលបានធ្វើដំណើរពីទីក្រុងអ៊ូហាន ជាទីដែលវីរុសកូរ៉ូណាថ្មីបានផ្ទុះឡើង និងកំពុងរាតត្បាតរហូតមកដល់សព្វថ្ងៃនេះ។
គណៈកម្មការសុខាភិបាលរបស់ប្រទេសចិន ដែលបានធ្វើបច្ចុប្បន្នភាពនៃស្ថានភាពវីរុសកូរ៉ូណាថ្មីជារៀងរាល់ថ្ងៃនោះ បានប្រកាសនៅថ្ងៃនេះថា មនុស្សដល់ទៅ ៨១១នាក់ហើយ បានស្លាប់ក្រោយឆ្លងវីរុសនេះ ហើយការឆ្លងវីរុសនេះ ត្រូវបានបញ្ជាក់ថា មានចំនួនជិត ៤ម៉ឺនករណី គិតត្រឹមថ្ងៃអាទិត្យនេះ។
ការឆ្លងវីរុសកូរ៉ូណាប្រភេទថ្មីនេះ បានរីករាលដាលទៅដល់ប្រទេសចំនួន ២៤ហើយនៅទូទាំងពិភពលោកក្រៅពីប្រទេសចិន ហើយវាការឆ្លងវីរុសនេះ ៦៤ករណី ត្រូវបានរកឃើញនៅលើនាវាអន្តរជាតិមួយដែលកំពុងស្ថិតក្នុងទឹកប្រទេសជប៉ុន៕
