អាជ្ញាធរខេត្តកំពង់ចាម បានឱ្យដឹងថា អ្នកភូមិ ៨នាក់ដែលបានប្រាស្រ័យទាក់ទងនឹងមនុស្ស ៦នាក់ដែលត្រូវបានរកឃើញឆ្លងជំងឺកូវីដ១៩កាលពីចុងសប្ដាហ៍កន្លងមកនេះ ត្រូវបានធ្វើតេស្តរួចរាល់ហើយ ហើយលទ្ធផលតេស្តបញ្ជាក់ថា ពួកគេមិនបានឆ្លងជំងឺផ្លូវដង្ហើមនេះទេ។
ក្នុងលិខិតបំភ្លឺកាលពីថ្ងៃម្សិលមិញនេះ រដ្ឋបាលខេត្តកំពង់ចាម បានឱ្យដឹងថា មនុស្ស ៦នាក់ ដែលត្រូវបានរកឃើញឆ្លងជំងឺកូវីដ១៩នោះ បានធ្វើដំណើរទៅសួរសុខទុក្ខបងប្អូននៅឯស្រុកព្រៃឈរកាលពីថ្ងៃទី២៤ និង២៥ ខែវិច្ឆិកាកន្លងមកនេះ។
រដ្ឋបាលខេត្តកំពង់ចាម បញ្ជាក់ថា មនុស្សទាំង ៦នាក់នោះ បានធ្វើដំណើរទៅលេងសាច់ញាតិរបស់ពួកគេ មុនពេលពួកគេត្រូវបានធ្វើតេស្តរកឃើញឆ្លងជំងឺកូវីដ។
បើតាមលិខិតបំភ្លឺដដែលនោះ មនុស្សទាំង ៦នាក់នោះ គឺជាអ្នកដែលបានពាក់ព័ន្ធនឹងភរិយារបស់អគ្គនាយកពន្ធនាគារ លោក ឆែម សាវុធ ដែលត្រូវបានរកឃើញឆ្លងជំងឺកូវីដ១៩កាលពីថ្ងៃទី២៨ ខែវិច្ឆិកា។
អភិបាលខេត្តកំពង់ចាម លោក អ៊ុន ចាន់ដា បានប្រាប់វីអូឌីនៅល្ងាចថ្ងៃនេះថា អ្នកភូមិ ៨នាក់ដែលបានប៉ះពាល់មនុស្ស៦នាក់នោះ ត្រូវបានប្រមូលយកសំណាកដើម្បីត្រួតពិនិត្យរួចហើយ ហើយលទ្ធផលតេស្តបញ្ជាក់ថា ពួកគាត់មិនបានឆ្លងជំងឺកូវីដ១៩ទេ។
លោក អ៊ុន ចាន់ដា ប្រាប់ថា៖ «លទ្ធផលចេញហើយថ្ងៃមិញ គឺអវិជ្ជមានទាំងអស់»។
អភិបាលខេត្តរូបនេះ បានឱ្យដឹងទៀតថា បើទោះបីជាលទ្ធផលអវិជ្ជមានបែបនេះក្ដី ប៉ុន្តែ អ្នកភូមិទាំង ៨នាក់នោះ ត្រូវបានតម្រូវឱ្យបន្តធ្វើចត្តាឡីស័ក ឬនៅដាច់ដោយឡែកនៅឯសណ្ឋាគារមួយក្នុងក្រុងកំពង់ចាមឱ្យគ្រប់រយៈពេល ១៤ថ្ងៃ។
លោក ចាន់ដា បានឱ្យដឹងទៀតថា អាជ្ញាធរក៏បានប្រមូលមនុស្ស ៣៥នាក់ផ្សេងទៀត ក្នុងនោះមានទាំងកម្មកររោងចក្រកាត់ដេរផងដែរដែលពាក់ព័ន្ធដោយប្រយោលនឹងអ្នកភូមិ ៨នាក់ ឱ្យធ្វើចត្តាឡីស័កនៅតាមផ្ទះសម្បែង និងបន្ទប់ជួលរបស់ពួកគេផងដែរ។
លោក អ៊ុន ចាន់ដា ប្រាប់បន្តថា៖ «ហ្នឹងគឺអ្នកប៉ះពាល់ដោយប្រយោល គឺតម្រូវឱ្យធ្វើចត្តាឡីស័ក ១៤ថ្ងៃបន្តទៀតដែរ។ មកដល់ពេលនេះ គឺ ៣៥នាក់។ យើងតម្រូវឱ្យគាត់ធ្វើចត្តាឡីស័កនៅតាមផ្ទះ និងបន្ទប់ជួលរបស់ពួកគាត់»។
កម្ពុជាកំពុងស្ថិតក្នុងក្ដីបារម្ភអំពីការឆ្លងរីករាលដាលនៃជំងឺកូវីដ១៩ បន្ទាប់ពីរកឃើញករណីឆ្លងក្នុងសហគមន៍លើកដំបូងកាលពីថ្ងៃទី២៨ ខែវិច្ឆិកា ដែលនៅលើភរិយាលោក ឆែម សាវុធ។ គិតមកដល់ថ្ងៃនេះ មនុស្ស ១៧នាក់ហើយ ត្រូវបានរកឃើញឆ្លងជំងឺកូវីដ១៩ បន្ទាប់ពីផ្ទុះករណីឆ្លងក្នុងសហគមន៍នេះមក។
រដ្ឋាភិបាលបានសម្រេចហាមឃាត់ការជួបជុំមនុស្សចាប់ពី២០នាក់ឡើងនៅរាជធានីភ្នំពេញ និងខេត្តសៀមរាប ខណៈដែលសាលារៀន កន្លែងហាត់ប្រាណ សារមន្ទីរ រោងភាពយន្ត ការសម្ដែងសិល្បៈនានា និងកម្មវិធីមង្គលការ ត្រូវបានណែនាំឱ្យផ្អាកជាបណ្ដោះអាសន្ន៕