លោកនាយករដ្ឋមន្ត្រីក្រើនរំឭកជាថ្មីទៀតទៅប្រជាពលរដ្ឋត្រូវចេះអនាម័យ និងអនុវត្តតាមការណែនាំរបស់ក្រសួងសុខាភិបាល ដើម្បីទប់ស្កាត់ការចម្លងមេរោគកូវីដ១៩។
លោកនាយករដ្ឋមន្ត្រី ហ៊ុន សែន បានអំពាវនាវបែបនេះនៅលើទំព័រហ្វេសប៊ុកផ្លូវការរបស់លោក ប្រាប់ទៅប្រជាពលរដ្ឋ ជាពិសេសយុវជន និងកម្មករ-កម្មការនី ត្រូវមានការប្រុងប្រយ័ត្នជាប់ជានិច្ចជាមួយនឹងជំងឺឆ្លងកូវីដ-១៩ ដ៏កាចសាហាវ បើទោះបីកម្ពុជាទទួលជំនួយវេជ្ជសាស្រ្តជាច្រើនពីប្រទេសចិន និងរកមិនឃើញមានអ្នកឆ្លងជំងឺនេះថ្មីបន្ថែមទៀតក៏ដោយ។
ទំព័រហ្វេសប៊ុកលោក ហ៊ុន សែន សរសេរថា៖ «បងប្អូនមិនត្រូវមើលស្រាលចំពោះជំងឺកូវីដ-១៩នេះដាច់ខាត។ ការមើលស្រាល និងមិនយកចិត្តទុកដាក់អំពីជំងឺនេះ គឺអាចប្រឈមនឹងការឆ្លងរោគដ៏គ្រោះថ្នាក់ខ្លាំងបំផុត»។
កម្ពុជាបានប្រកាសពីការរកមិនឃើញករណីថ្មីនៃការឆ្លងវីរុសកូរ៉ូណាអស់រយៈពេលពីរសប្ដាហ៍មកហើយ ចាប់តាំងពីថ្ងៃទី១២ ខែមេសា នៅពេលកម្ពុជាប្រកាសពីការរកឃើញករណីចុងក្រោយបំផុត ដែលបានរកឃើញលើបុរសសញ្ជាតិកាណាដាដើមកំណើតចិន អាយុ ៥០ឆ្នាំ និងនារីជនជាតិវៀតណាម អាយុ ២៤ឆ្នាំ នៅក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
លោកនាយករដ្ឋមន្ត្រី ហ៊ុន សែន បញ្ជាក់ថា ថ្ងៃចុងសប្តាហ៍ ទោះបីសម្រាកនៅផ្ទះ ឬធ្វើដំណើរទីជិតឆ្ងាយ គឺត្រូវពាក់ម៉ាស ហើយមានទឹកអាល់កុល និងជែលសម្រាប់ដុសលាងសម្អាតដៃកម្ចាត់មេរោគឱ្យបានស្អាតល្អគ្រប់ពេល ដើម្បីចៀសវាងការចម្លងរោគកូរ៉ូណាពីម្នាក់ទៅម្នាក់ទៀត។
ក្រសួងសុខាភិបាលអះអាងថា គិតត្រឹមម៉ោង៧ព្រឹក ថ្ងៃទី២៦ ខែមេសានេះ អ្នកឆ្លងជំងឺកូវីដ១៩ សរុប ១២២នាក់។ ក្នុងចំណោមអ្នកឆ្លង ១២២នាក់ ត្រូវបានគ្រូពេទ្យព្យាបាលជាសះស្បើយចំនួន ១១៧នាក់ ហើយនៅសល់ ៥នាក់ទៀតប៉ុណ្ណោះ កំពុងសម្រាកព្យាបាលនៅមន្ទីរពេទ្យរាជធានី-ខេត្ត៕
