សម្ព័ន្ធអ្នកសារព័ត៌មានកម្ពុជា (ខេមបូចា) និងក្លឹបអ្នកសារព័ត៌មានបរទេសនៅកម្ពុជា (OPCC) បានលើកឡើងថា សេរីភាពសារព័ត៌មាននៅកម្ពុជាក្នុងរយៈពេល៤ខែចុងក្រោយនេះ នៅតែបន្តរងការគំរាមកំហែងពីអ្នកមានអំណាចតាមរយៈការចោទប្រកាន់របស់តុលាការ ឬការចាប់ដាក់ពន្ធនាគារ។
ស្ថាប័នគាំពារអ្នកសារព័ត៌មានទាំងពីរនេះ បានលើកឡើងដូច្នេះនៅក្នុងសេចក្ដីថ្លែងការណ៍រួមរបស់ពួកគេដែលចេញផ្សាយនៅថ្ងៃទី០៣ ខែឧសភានេះ ចំថ្ងៃដែលពិភពលោកប្រារព្ធទិវាសេរីភាពសារព័ត៌មាន។
ក្នុងលិខិត ខេមបូចា និង OPCC បានលើកឡើងថា អ្នកសារព័ត៌មានជាច្រើន និងស្ថាប័នសារព័ត៌មាននៅកម្ពុជា នៅតែប្រឈមនឹងបញ្ហាធ្ងន់ធ្ងរក្នុងការងារប្រចាំថ្ងៃ ពីអ្នកមានអំណាច និងស្ថាប័នមានឥទ្ធិពល ឬតាមរយៈការចោទប្រកាន់របស់តុលាការ ឬការចាប់ដាក់ពន្ធនាគារជាដើម។
ស្ថាប័នទាំងពីរនេះ លើកឡើងថា កត្តាទាំងនេះ គឺជាដើមចមដែលនាំឱ្យសេរីភាពអ្នកសារព័ត៌មានត្រូវបានរឹតត្បិត ក្រោយពីមានការចាប់ខ្លួន លោក សុវណ្ណ រិទ្ធី អ្នករាយការណ៍ព័ត៌មាន និងជានិពន្ធនាយកសារព័ត៌មានអនឡាញ TVFB និងដកអាជ្ញាប័ណ្ណកាលពីថ្ងៃទី៧ ខែមេសា រួមទាំងបិទសារព័ត៌មានចក្រវាទ្បធីវី អនឡាញ កាលពីថ្ងៃ២៧ ខែដដែលទៀតផង។
ទោះជាបែបនេះក្តី ខេមបូចា និងOPCC មានជំនឿថា ដើម្បីឱ្យសេរីភាពសារព័ត៌មាននៅកម្ពុជាមានភាពល្អប្រសើរ លុះត្រាតែទម្លាក់ចោលការចោទប្រកាន់ និងដោះលែងអ្នកសារព័ត៌មាន ប្រសិនមិនមានភស្តុតាងណាបង្ហាញថា បានប្រព្រឹត្តបទឧក្រិដ្ឋ ហើយអនុញ្ញាតឱ្យអ្នកសារព័ត៌មាន និងស្ថាប័នព័ត៌មានដំណើរការដោយចំហ សេរី គ្មានការគាបសង្កត់ ឬគំរាមកំហែង និងធ្វើវិសោធនកម្មច្បាប់គ្រប់គ្រងប្រទេសក្នុងភាពអាសន្នជាដើម។
ប្រធានផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ណុប វី មានប្រសាសន៍ក្នុងវេទិការជជែកពិភាក្សាតុមូលលើប្រព័ន្ធអនឡាញជាមួយមន្ត្រីជាន់ខ្ពស់ក្រសួងព័ត៌មាន និងអ្នកសារព័ត៌មានផ្សេងទៀត នាព្រឹកថ្ងៃនេះថា អ្នកសារព័ត៌មានកម្ពុជា នៅតែបន្តការរឹតត្បិតសេរីភាព និងរងការគំរាមកំហែង ដោយសារអ្នកដែលហ៊ានរាយការណ៍ពីចំណុចរសើបរបស់រដ្ឋាភិបាល ឬអ្នកមានអំណាចជាដើម។
លោក ណុប វី មានប្រសាសន៍ថា៖ «ខ្ញុំឃើញមានបញ្ហាប្រឈមសន្តិសុខ សុវត្ថិភាព នៅពេលពួកគាត់ចុះយកព័ត៌មានមិនសូវមានកិច្ចសហការជាមួយអាជ្ញាធរមូលដ្ឋាន ដូចជា ករណីឃាត់ខ្លួនអ្នកសារព័ត៌មាន ៧រូបនៅខេត្តរតនៈគិរី ថ្មីៗនៅខេត្តស្វាយរៀង ដោយសារពួកគាត់ផ្តល់សេចក្តីរាយការណ៍ព័ត៌មានទាក់ទងការដឹកជ្រូកចូលពីប្រទេសជិតខាង ពួកគាត់ត្រូវបានឃាត់ខ្លួនរយៈពេលខ្លី មានការបញ្ជាពីព្រះរាជអាជ្ញាខេត្តស្វាយរៀងជាដើម ហើយពួកគាត់ប្រឈម ជាពិសេសពួកគាត់រាយការណ៍ពីសកម្មភាពអវិជ្ជមានរបស់រដ្ឋាភិបាល និងអាជ្ញាធរមានសមត្ថកិច្ចនៅមូលដ្ឋាន»។
ករណីនេះលោក ណុប វី ស្នើទៅរដ្ឋាភិបាល និងក្រសួងព័ត៌មាន ឱ្យជួួយគាំទ្រ ឬជួយការពារអ្នកសារព័ត៌មាន ដែលហ៊ានរាយការណ៍ពីការពិត ឱ្យរួចផុតពីបញ្ហាប្រឈមទាំងនោះ ដើម្បីឱ្យសេរីភាពសារព័ត៌មាននៅកម្ពុជាទទួលបានផលវិជ្ជមាន។
អ្នកគ្រប់គ្រងផ្នែកវិទ្យុនៃមជ្ឈមណ្ឌលព័ត៌មានស្ត្រីកម្ពុជា អ្នកស្រី ហង្ស សម្ផស្ស ដែលជាវាគ្មិនដែរនោះ និយាយថា អ្នកស្រីសង្កេតឃើញថា អ្នកសារព័ត៌មានមួយចំនួន ជាពិសេសស្ត្រីរងការគំរាមកំហែងផ្លូវចិត្តពីរដ្ឋាភិបាល និងស្ថាប័នពាក់ព័ន្ធ នៅពេលចុះបំពេញបេសកកម្មការងាររបស់ខ្លួន។ ករណីនេះ អ្នកស្រីអំពាវនាវទៅរដ្ឋាភិបាល និងក្រសួងព័ត៌មាន លើកទឹកចិត្តស្ត្រី ដើម្បីជាផ្នែកមួយជួយសង្គមជាតិឱ្យកាន់តែរីកចម្រើន។
អ្នកស្រី ហង្ស សម្ផស្ស និយាយថា៖ «ខាងរដ្ឋាភិបាល ក្រសួងព័ត៌មានជួយសម្រួល ចង់ឱ្យអ្នកកាសែតស្ត្រីមានច្រើន សម្រាប់ខ្ញុំឃើញអ្នកកាសែតស្ត្រីមានតិច នៅពេលអ្នកកាសែតស្ត្រីទៅបំពេញការងារផ្ទាល់មានតិច ខ្ញុំស្តាយនៅពេលដែលស្ត្រីគាត់ធ្វើអ្នកកាសែតហើយនាំគ្នាស្តីថាទាំងមិនត្រូវ ទាំងប្រើពាក្យមិនសមរម្យទៀត គួរតែមានការលើកតម្កើងស្ត្រី កិច្ចការអ្នកកាសែតត្រូវប្រឈមគ្រប់ពេលវេលា ត្រូវរាយការណ៍ព័ត៌មានឱ្យសុក្រិត គាត់ត្រូវចេញពីការិយាល័យចេញយកព័ត៌មានពិតផ្សព្វផ្សាយហើយប្រឈមទៀត»។
នៅក្នុងវេទិកាអនឡាញនោះ ក៏មានអ្នកសារព័ត៌មានមួយចំនួនសួរអំពីរបាយការណ៍របស់ អង្គការអ្នករាយការណ៍គ្មានព្រំដែន (Reporter without border) ថា សេរីភាពសារព័ត៌មាននៅកម្ពុជាធ្លាក់ចុះផងដែរ។
ប៉ុន្តែ ត្រូវបានអ្នកនាំពាក្យក្រសួងព័ត៌មាន លោក អ៊ុក គឹមសេង ច្រានចោលនូវព័ត៌មាននេះ ដោយលោកថា អ្នកជំនាញនៃស្ថាប័នអន្តរជាតិមួយនេះ ធ្វើការវាយតម្លៃមិនមានភស្តុតាងការពិតនោះទេ។
លោក អ៊ុក គឹមសេង មានប្រសាសន៍ថា៖ «មកដល់ថ្ងៃនេះ តើមានមន្ត្រីណាម្នាក់របស់ Reporter without border មកជាន់ជើងលើទឹកដីកម្ពុជា បានជួបជាមួយភ្នាក់ងារជាមួយមន្ត្រីរដ្ឋាភិបាលទេ? គាត់អត់ដែលមកទេ ឱ្យយើងទទួលស្គាល់ម៉េច បើគាត់អង្គុយនៅក្នុងការិយាល័យ ហើយគាត់ចាំតែចេញពិន្ទុ»។
ដោយឡែកសារព័ត៌មានអនឡាញ TVFB និងសារព័ត៌មានចក្រក្រវាទ្ប ឯណោះវិញ លោក អ៊ុក គឹមសេង បញ្ជាក់ថា ក្រសួងព័ត៌មានបិទសារព័ត៌មានចក្រវាទ្បធីវី អនឡាញ ដោយសារបុគ្គលនោះរាយការណ៍ព័ត៌មានគ្មានសីលធម៌ និងមិនគោរពតាមការណែនាំរបស់ក្រសួងម្តងជាពីរដង។
លោកនាយករដ្ឋមន្ត្រី ហ៊ុន សែន នៅថ្ងៃនេះបានចេញលិខិតអបអរសាទរ ទិវាសេរីភាពសារព័ត៌មានសកលលោក ដែលធ្វើឡើងក្នុងគោលបំណងលើកស្ទួយសិទ្ធិ សេរីភាពនៃការបញ្ចេញមតិ សេរីភាពខាងសារព័ត៌មាន ធានានូវឯករាជ្យភាពនៃ ប្រព័ន្ធផ្សព្វផ្សាយព័ត៌មាន និងធានាឱ្យអ្នកសារព័ត៌មាន បំពេញភារកិច្ចលើវិជ្ជាជីវៈរបស់ខ្លួនដោយគ្មានការភ័យ ខ្លាច ព្រមទាំងជំរុញតួនាទីរបស់ស្ថាប័នសារព័ត៌មាន ឱ្យកាន់តែសកម្មថែមទៀត ដើម្បីចូលរួមចំណែកលើកស្ទួយ សុខុមាលភាពសង្គម ការថែរក្សាសុខសន្តិភាព ការអភិវឌ្ឍប្រកបដោយចីរភាព និងសុខដុមនីយកម្មនៅលើ សកលលោកទាំងមូល។
បន្ថែមពីនេះ រដ្ឋាភិបាល គាំទ្រ និងលើកកម្ពស់សិទ្ធិ សេរីភាពនៃការបញ្ចេញមតិ និងសេរីភាពខាងព័ត៌មាន ត្រូវធានាដោយរដ្ឋធម្មនុញ្ញ និងច្បាប់ស្តីពីរបបសារព័ត៌មានដែលធានានូវឯករាជ្យភាពនៃការផ្សាយ សិទ្ធិនៃការរក្សាការសម្ងាត់ស្តីពីប្រភពព័ត៌មានរបស់ខ្លួន ប្រកបដោយការទទួលខុសត្រូវ និងមានភាពស្មោះត្រង់ចំពោះវិជ្ជាជីវៈក្នុងការផ្សព្វផ្សាយព័ត៌មាន។
របាយការណ៍សេរីភាពសារព័ត៌មានពិភពលោកឆ្នាំ២០១៩ ដែលចេញដោយអង្គការអ្នកកាសែតគ្មានព្រំដែន បានចាត់ថ្នាក់ចំណាត់ថ្នាក់សេរីភាពសារព័ត៌មានកម្ពុជា ១៤៣ លើ ១៨០ ដែលបានធ្លាក់ចុះជាបន្តបន្ទាប់ចាប់តាំងពីឆ្នាំ២០១៧មក (ឆ្នាំ២០១៧ កម្ពុជាទទួលបានចំណាត់ថ្នាក់ ១៣២)៕