អង្គការការពារសិទ្ធិមនុស្សលីកាដូ បានអះអាងថា ព្រះសង្ឃ និងក្រុមយុវជនជាង ១០អង្គ/នាក់ ត្រូវបានឃាត់ខ្លួន និងរងការគំរាមកំហែងពីសមត្ថកិច្ចខេត្តបាត់ដំបងកាលពីយប់ថ្ងៃម្សិលមិញនេះ បន្ទាប់ពីពួកគេវិលត្រឡប់ពីតវ៉ាទាមទារឱ្យវិស័យផ្ដល់កម្ចី ពន្យាពេលសងប្រាក់កម្ចីអំឡុងពេលវិបត្តិសុខភាពសកលនេះ។
អង្គការលីកាដូ បានអះអាងបែបនេះក្នុងសេចក្ដីថ្លែងការណ៍មួយ ដែលត្រូវបានផ្សព្វផ្សាយលើវេបសាយ និងទំព័រហ្វេសប៊ុករបស់ខ្លួននៅរសៀលថ្ងៃនេះ។
ក្នុងសេចក្ដីថ្លែងការណ៍នោះ លីកាដូលើកឡើងថា សមាជិកក្រុមយុវជនចំនួន ៦នាក់នៃខ្មែរថាវរៈ និងសកម្មជនសិទ្ធិមនុស្ស លោក ហ៊ុន វណ្ណៈ និងព្រះសង្ឃចំនួន ៥អង្គ ត្រូវបានសមត្ថកិច្ចឃាត់ខ្លួនកាលពីយប់មិញថ្ងៃទី៩ ខែឧសភា នៅតាមដងផ្លូវខាងក្រៅវត្តដំរីស ស្ថិតក្នុងខេត្តបាត់ដំបង នៅពេលពួកគាត់កំពុងធ្វើដំណើរមកពីការដើរហែក្បួនដែលមានផ្សាយផ្ទាល់នៅលើបណ្ដាញសង្គម នៅចំពីមុខគ្រឹះស្ថានមីក្រូហិរញ្ញវត្ថុមួយចំនួនដូចជា ប្រាសាក់ និងអេអឹមខេ (AMK) ជាដើម។
លីកាដូបញ្ជាក់ថា ក្រុមអ្នកតវ៉ាទាំង ៦នាក់នោះ មានស្ត្រី ៣នាក់ ត្រូវបានដោះលែងឱ្យមានសេរីភាពវិញ ក្រោមលក្ខខណ្ឌចុះហត្ថលេខាលើកិច្ចសន្យាជាមួយអាជ្ញាធរ បន្ទាប់ពីដាក់ឱ្យស្ថិតនៅក្នុងបន្ទប់ឃុំឃាំងអស់រយៈពេលជាច្រើនម៉ោង។
ចំណែកព្រះសង្ឃ ៥អង្គ ក៏រងការគំរាមកំហែងបណ្តេញចេញពីវត្តផងដែរ បើព្រះអង្គមិនផ្តិតមេដៃលើកិច្ចសន្យា ដែលបញ្ជាក់ថា បញ្ឈប់សកម្មភាពតវ៉ារបស់ព្រះអង្គជំនួសអ្នកខ្ចីប្រាក់តទៅទៀត។
បើតាមលីកាដូ ពលរដ្ឋកម្ពុជាជាង ២លាន ៥សែននាក់ មានជាប់បំណុលមីក្រូហិរញ្ញវត្ថុទំហំដល់ទៅជាង ១០ពាន់លានដុល្លារ។
លីកាដូ បញ្ជាក់ថា ទោះបីជាធនាគារជាតិនៃកម្ពុជា បានលើកទឹកចិត្តគ្រឹះស្ថានមីក្រូហិរញ្ញវត្ថុ ឱ្យធ្វើការពន្យាពេលបង់សងប្រាក់ តាមករណីជាក់ស្ដែងនីមួយៗក៏ដោយ កន្លងមក សង្គមស៊ីវិលជាង ១៣៥ស្ថាប័ន នៅតែបន្តស្នើសុំដល់គ្រឹះស្ថានមីក្រូហិរញ្ញវត្ថុ នៅតែបន្តស្នើសុំដល់គ្រឹះស្ថានមីក្រូហិរញ្ញវត្ថុ និងរាជរដ្ឋាភិបាល ឱ្យជួយផ្អាកការបង់សងប្រាក់ដើម និងការប្រាក់សម្រាប់រយៈពេលយ៉ាងតិច ៣ខែ និងប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញផងដែរ៕
