តួលេខពីស្ថាប័នគ្រប់គ្រងលើចំណូលតំបន់ទេសចរណ៍អង្គរ បានបង្ហាញថា ចំណូលបានមកពីការលក់សំបុត្រសម្រាប់ភ្ញៀវទេសចរបរទេសចូលទស្សនាតំបន់រមណីយដ្ឋានប្រវត្តិសាស្ត្រមួយនេះ បានធ្លាក់ចុះខ្លាំងនៅពាក់កណ្ដាលឆ្នាំនេះ។
ក្នុងសេចក្ដីប្រកាសព័ត៌មានចេញកាលពីសប្ដាហ៍មុន គ្រឹះស្ថានអង្គរដែលជាក្រុមហ៊ុនរដ្ឋគ្រប់គ្រងលើការលក់សំបុត្រចូលទស្សនាតំបន់អង្គរ បានបង្ហាញថា ភ្ញៀវទេសចរអន្តរជាតិចំនួនជាង ៣៨ម៉ឺននាក់ បានចូលទស្សនាតំបន់រមណីយដ្ឋានប្រវត្តិសាស្ត្រមួយនេះនៅចន្លោះខែមករា ដល់ខែមិថុនាកន្លងមកនេះ ដោយបានធ្លាក់ចុះដល់ទៅជិត ៧៦ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ក្រុមហ៊ុនរដ្ឋមួយនេះ បានឱ្យដឹងទៀតថា កម្ពុជាប្រមូលចំណូលបានជាង ១៨លានដុល្លារមកពីការលក់សំបុត្រសម្រាប់ភ្ញៀវទេសចរបរទេសចូលទស្សនាតំបន់ទេសចរណ៍ប្រវត្តិសាស្ត្រមួយនេះនៅក្នុងរយៈពេល ៦ខែមកនេះ ប៉ុន្តែ បានធ្លាក់ចុះដល់ទៅជាង ៦៧ភាគរយ បើធៀបនឹងចំណូលដែលកម្ពុជារកបានក្នុងរយៈពេលដូចគ្នាកាលពីឆ្នាំមុន។
គ្រឹះស្ថានអង្គរ ក៏បានប្រកាសឱ្យដឹងផងដែរថា ទឹកប្រាក់ដល់ទៅជាង ៧៧ម៉ឺនដុល្លារនៅក្នុងចំណោមចំណូលបានមកពីការលក់សំបុត្រឱ្យភ្ញៀវចូលទស្សនាតំបន់ទេសចរណ៍មួយនេះ ត្រូវបានប្រគល់ទៅមូលនិធិគន្ធបុប្ផានៅក្នុងរយៈពេលពាក់កណ្ដាលឆ្នាំ២០២០៕
