មន្ត្រីសិទ្ធិមនុស្សប្រចាំខេត្តរតនគិរី និយាយមុននេះបន្តិចថា ការដែលសកម្មជនព្រៃឈើម្នាក់រងរបួសធ្លាយពោះវៀន អាចជាករណីមនុស្សឃាត ព្រោះវាបានកើតឡើងក្រោយសកម្មជនម្នាក់ទៀតត្រូវបានគេវាយមុខអាជ្ញាធរក្នុងវេទិកាសាធារណៈមួយកាលពីម្សិលមិញ។
មន្ត្រីសម្របសម្រួលសមាគមអាដហុកប្រចាំខេត្តរតនគិរី លោក ឌិន ខន្នី និយាយទៀតថា លោក កែវ ហ្វើញ អាយុ ៥០ឆ្នាំ ត្រូវបានគេរាយការណ៍មកថា បានរងរបួសធ្លាយពោះវៀននៅឯចម្ការរបស់លោក។
លោក ឌិន ខន្នី ប្រាប់ថា៖ «ឥលូវគាត់រងរបួសធ្ងន់ធ្លាយពោះវៀនដែលគាត់ទៅស្រែ។ ខ្ញុំគិតថា នេះជាករណីមនុស្សឃាត»។
លោក ឌិន ខន្នី អះអាងថា ក្រុមគ្រួសារ និងសាច់ញាតិបានបញ្ជូនលោក កែវ ហ្វើញ ទៅសង្គ្រោះនៅមន្ទីរពេទ្យនៅថ្ងៃនេះ។
មន្ត្រីរូបនេះ អះអាងថា លោក កែវ ហ្វើញ ជាសកម្មជនការពារព្រៃឈើរស់នៅក្នុងភូមិសមុត្រក្រោម ឃុំសេដា ស្រុកលំផាត់ ខេត្តរតនគិរី ដូចលោក ឆន ផល្លា ដែរ។ លោក ឆន ផល្លា ត្រូវបានគេវាយឱ្យរងរបួសកាលពីម្សិលមិញដែរ។
បើតាមមន្ត្រីឃ្លាំមើលសិទ្ធិមនុស្សអាដហុក លោក កែវ ហ្វើញ ក៏ដូចលោក ឆន ផល្លា ដែរ គឺជាសមាជិកសហគមន៍ដែលបានរាយការណ៍ពីបទល្មើសព្រៃឈើ ធ្លាប់ប្តឹងអ្នកភូមិ និងអាជ្ញាធរពាក់ព័ន្ធមួយចំនួនក្នុងស្រុកនេះទៅតុលាការ ពាក់ព័ន្ធនឹងបទល្មើសព្រៃឈើ។
VOD នៅមិនអាចសុំបញ្ជាក់ករណីនេះពីមេភូមិសមុត្រក្រោម លោក ខំា ផសាវ៉ាត បានទេគិតត្រឹមម៉ោងផ្សាយនេះ ដោយទូរសព្ទរបស់លោកគ្មានអ្នកទទួល។
យ៉ាងណា មន្ត្រីសម្របសម្រួលសមាគមអាដហុក លោក ឌិន ខន្នី អំពាវនាវឱ្យក្រសួងមហាផ្ទៃចុះស៊ើបអង្កេតករណីនេះបន្ទាន់ ដើម្បីទប់ស្កាត់បទល្មើសព្រៃឈើ និងការពារអាយុជីវិតអ្នកការពារព្រៃឈើនៅតំបន់នោះ៕
