បុរសម្នាក់ដែលសកម្មក្នុងការរាយការណ៍ពីបទល្មើសព្រៃឈើនៅខេត្តរតនគិរី ត្រូវបានសមត្ថកិច្ចបញ្ជូនទៅសម្រាកព្យាបាលនៅមន្ទីរពេទ្យខេត្ត ក្រោយរងអំពើហិង្សាក្នុងវេទិកាសាធារណៈមួយដែលរៀបចំដោយអាជ្ញាធរស្រុកលំផាត់។
លោក ឆន ផល្លា ជាសកម្មជនការពារព្រៃឈើម្នាក់នៅខេត្តរតនគិរី ត្រូវគេព្រួតវាយនៅចំពោះមុខអាជ្ញាធរក្នុងវេទិកាសាធារណៈមួយនៅសាលាឃុំសេដា ស្រុកលំផាត់ ក្រោយពីបុរសរូបនេះឡើងថ្លែងប្រាប់អាជ្ញាធរពីការរីករាលដាលនៃបទល្មើសព្រៃឈើនៅក្នុងសហគមន៍ជនជាតិដើមភាគតិច។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី ប្រាប់វីអូឌីនៅថ្ងៃនេះថា លោក ឆន ផល្លា ត្រូវបានសមត្ថកិច្ចប៉ុស្តិ៍ឃុំសេដាបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តនេះហើយកាលពីម្សិលមិញប្រហែលម៉ោង ៦ល្ងាច។
មន្ត្រីសិទ្ធិមនុស្សរូបនេះ បញ្ជាក់ថា បើតាមការរៀបរាប់ប្រាប់ពីលោក ឆន ផល្លា គឺលោក ឆន ផល្លា កំពុងមានអាការឈឺចាប់ក្នុងខ្លួន ដោយតឹង និងចុកទ្រូងកន្លែងត្រូវបានគេវាយ។ លោក ឌិន ខន្នី បន្ថែមថា ខណៈលោក ឆន ផល្លា កំពុងសម្រាកព្យាបាលនៅមន្ទីរពេទ្យបង្អែកខេត្ត ក៏មានសមត្ថកិច្ចស្លៀកពាក់ស៊ីវិល និងឯកសណ្ឋាន ៣ ទៅ ៤នាក់ នៅចាំយាមខាងក្រៅបន្ទប់ និងខ្លោងទ្វារមន្ទីរពេទ្យផងដែរ។
វីអូឌីបានព្យាយាមទាក់ទងសុំការបញ្ជាក់ពីជនរងគ្រោះ លោក ឆន ផល្លា ភរិយា និងសាច់ញាតិរបស់លោក ឆន ផល្លា ដែរ ប៉ុន្តែ ទូរសព្ទចូលគ្មានអ្នកទទួល។
បើតាមមន្ត្រីសមាគមការពារសិទ្ធិមនុស្សអាដហុក គឺលោក ឆន ផល្លា ត្រៀមប្តឹងអ្នកដែលប្រើហិង្សាលើរូបគាត់ទៅតុលាការដើម្បីផ្តល់យុត្តិធម៌សម្រាប់ខ្លួន។
ប៉ុន្តែ លោក ឌិន ខន្នី ថា បើទោះបីជនរងគ្រោះមិនទាន់បានប្តឹង គឺសមត្ថកិច្ចគួរតែមានចំណាត់ការផ្លូវច្បាប់ភ្លាមៗ ដោយលោកចាត់ទុកករណីអំពើហិង្សានេះថា ជាការប៉ុនប៉ងមនុស្សឃាតដោយចេតនា។
លោក ឌិន ខន្នី បន្ថែមថា អ្នកប្រើហិង្សាមិនមែនត្រឹមតែគំរាមកំហែងលើជនរងគ្រោះនោះទេ គឺបានគំរាមកំហែងវាយលើសាច់ញាតិជនរងគ្រោះ និងអ្នកដែលចង់ទៅមើលជនរងគ្រោះថែមទៀត។
លោក ឌិន ខន្នី ប្រាប់ថា៖ «ករណីនេះមិនមែនជាការប្រើហិង្សាធម្មតាទេ វាជាការប៉ុនប៉ងមនុស្សឃាតដោយចេតនាទៀត ព្រោះថា ប្រសិនជាសាច់ញាតិជនរងគ្រោះជួយមិនទាន់ វាអាចនឹងស្លាប់។ អីចឹងហើយជាគោលការណ៍ច្បាប់ បើកាលណាជនទាំងឡាយណាគាត់ប្រព្រឹត្តនូវអំពើហិង្សា និងការប៉ុនប៉ងមនុស្សឃាតដោយចេតនាទៅលើអ្នកណាម្នាក់ ករណីហ្នឹងបណ្តឹងអាជ្ញាត្រូវតែមានចំណាត់ការជាបន្ទាន់»។
ស្នងការខេត្តរតនគិរី លោក យិន ចំណាន បានច្រានចោលនូវការអះអាងថា មានគេប្រើអំពើហិង្សាលើលោក ឆន ផល្លា និងឡោមព័ទ្ធដោយក្រុមអ្នកភូមិ និងកងកម្លាំងនគរបាល។ លោកថា ព័ត៌មាននេះមិនពិត និងគ្មានការប្រើអំពើហិង្សា ឬគំរាមកំហែងណាមួយទៅលើលោក ឆន ផល្លា នោះឡើយ ហើយថា សមត្ថកិច្ចក៏គ្មានវិធានការអ្វីដែរ។
លោក យិន ចំណាន អះអាងថា កាលពីម្សិលមិញ លោក ឆន ផល្លា បានទៅអុកឡុកវេទិកាសាធារណៈមួយដែលរៀបចំដោយអាជ្ញាធរ ហើយថា ក្នុងវេទិកានោះ លោក ឆន ផល្លា បានប្រើពាក្យអសុរសប៉ះពាល់ដល់ប្រជាពលរដ្ឋ ដែលបណ្តាលឱ្យប្រជាពលរដ្ឋចូលរួមវេទិកានោះខឹងសម្បា និងមានជម្លោះពាក្យសម្តីគ្នា ប៉ុន្តែ គ្មានអំពើហិង្សាកើតឡើងដូចការលើកឡើងឡើយ។
ស្នងការរូបនេះបញ្ជាក់ថា ករណីលោក ឆន ផល្លា ទៅសម្រាកព្យាបាលនៅមន្ទីរពេទ្យបង្អែកនោះ គឺខាងគ្រូពេទ្យចេញលិខិតបញ្ជាក់ហើយថា លោក ឆន ផល្លា ពុំមានស្លាកស្នាម ឬរបួសអ្វីនោះទេ ក្រៅពីរោគសញ្ញាបញ្ជាក់ថា មានជំងឺលើសឈាម និងជំងឺទឹកនោមផ្អែម។
លោក យិន ចំណាន បន្ថែមថា៖ «គ្មានពីណាទៅវាយដំច្រំធាក់គាត់ទេ។ គាត់ចេះតែប្រាប់អ្នកសារព័ត៌មានអញ្ចេះអញ្ចុះថា មានការប្រើអំពើហិង្សាទៅលើគាត់ រឿងហ្នឹងមិនពិតទេ។ ខ្ញុំបានបកស្រាយរួចហើយ គ្មានរឿងអីចឹងកើតឡើងទៅលើ ឆន ផល្លា ហ្នឹងទេ។ គាត់ភ័យខ្លាចខ្លួនគាត់។ គាត់បានពឹងសមត្ថកិច្ចឱ្យជូនគាត់មកពេទ្យក្រុងបាលុង ហើយពេទ្យក៏បានចេញលិខិតបញ្ជាក់ត្រឹមត្រូវថា គាត់គ្មានរបួសគ្មានស្នាមទេ។ អ្វីដែលគាត់ឈឺ ទី១ លើសឈាម ទី២ ទឹកនោមផ្អែម»។
មេភូមិសាមុត្រក្រោម លោក ខំា ផសាវ៉ាត ដែលចូលរួមវេទិកាសាធារណៈកាលពីម្សិលមិញ អះអាងថា ពលរដ្ឋ ៤ភូមិនៅតំបន់នោះមិនពេញចិត្តទង្វើរបស់លោក ឆន ផល្លា នោះទេ ដោយថា បុរសនោះបានប្តឹងគេគ្រប់គ្នា។
មេភូមិរូបនេះ អះអាងទៀតថា វេទិកាសេរីនេះ អាជ្ញាធរមិនបានអញ្ជើញលោក ឆន ផល្លា មកចូលរួមទេ តែលោកថា លោក ឆន ផល្លា បានមកចូលរួមដោយខ្លួនឯង ហើយឡើងនិយាយខុសប្រធានបទ រិះគន់រឿងបទល្មើសព្រៃឈើ និងយកទូរសព្ទថតមុខអភិបាលស្រុក មេប៉ុស្តិ៍ ក្នុងវេទិកាធ្វើឱ្យអ្នកភូមិផ្ទុះកំហឹង៕