ហាងកាហ្វេមួយកន្លែងនៅស្ថានីយប្រេងឥន្ធនៈស្តុបបូកគោ ក្នុងរាជធានីភ្នំពេញ ដែលខ្មាន់កំាភ្លើងបាញ់សម្លាប់អ្នកវិភាគនយោបាយល្បីឈ្មោះ លោក កែម ឡី បានបិទទ្វារមិនទទួលអតិថិជននោះឡើយនៅព្រឹកថ្ងៃនេះ នៅចំថ្ងៃខួប ៤ឆ្នាំនៃការបាញ់សម្លាប់ ខណៈអាជ្ញាធរដាក់ពង្រាយកម្លាំងជុំវិញនោះ ដើម្បីរឹតបន្តឹងសន្តិសុខ។
កម្លាំងសមត្ថកិច្ចរាប់សិបនាក់ត្រូវបានគេដាក់ពង្រឹងនៅជុំវិញបរិវេណស្តាម៉ាត ស្ថិតនៅម្ដុំស្តុបបូកគោ ហើយខ្លះទៀតអង្គុយជាក្រុមៗលើរថយន្តក្នុងលក្ខណៈប្រុងជើងការ ខណៈ៣ឆ្នាំជាប់គ្នាមកនេះ ក្រុមអង្គការសង្គមស៊ីវិល និងអ្នកគាំទ្រលោក កែម ឡី បានទៅជួបជុំគ្នាពិសាកាហ្វេនៅទីនោះ និងដាក់កម្រងផ្ការំឭកវិញ្ញាណក្ខន្ធលោក កែម ឡី តាមបែបសាសនា។
ប៉ុន្តែ ការដាក់ពង្រាយកងកម្លាំង រួមទាំងការបិទទ្វារស្តាម៉ាតនេះ គ្មានវត្តមានក្រុមអង្គការសង្គមស៊ីវិលអាចទៅដាក់កម្រងផ្ការំឭកខួប ៤ឆ្នាំនៃការបាញ់សម្លាប់លោក កែម ឡី នៅទីតាំងស្តុបបូកគោនេះបានទេ។
លោក ព្រាប កុល ដែលប្រាប់ថា លោកគឺជាអ្នកឃ្លាំមើលបញ្ហាសង្គមក្រោយពីលោកបញ្ចប់អាណត្តិដឹកនាំនៅអង្គការតម្លាភាពកម្ពុជានោះ បានបង្ហាញវត្តមាននៅឯស្តាម៉ាតនោះផងដែរនៅព្រឹកថ្ងៃនេះ ដើម្បីទិញកាហ្វេ ២កែវ និងអង្គុយញ៉ាំនៅទីនោះ ប៉ុន្តែ ស្តាម៉ាតមួយនេះមិនបានបើកលក់ដូរទេ។
លោក ព្រាប កុល បានប្រាប់ក្រុមអ្នកសារព័ត៌មានថា លោកគ្រាន់តែចូលទៅគោរពវិញ្ញាណក្ខន្ធលោកបណ្ឌិត កែម ឡី នៅទីនោះដូចដែលលោកធ្លាប់បានធ្វើក្នុងរយៈពេល ៣ឆ្នាំមុន។
លោក ព្រាប កុល ប្រាប់ថា៖ «ខ្ញុំជឿថា ប្រជាពលរដ្ឋខ្មែររាប់លាននាក់ សុទ្ធតែចង់ឱ្យបង្ហាញភស្តុតាង និងផ្តល់យុត្តិធម៌ឱ្យគាត់បានស្ងប់ចិត្តទាំងអស់គ្នា ពិសេសក្រុមគ្រួសារលោកបណ្ឌិត កែម ឡី»។
VOD បានស្វែងរកការបកស្រាយពីម្ចាស់ស្ថានីយប្រេងឥន្ធនៈស្តុបបូកគោ ប៉ុន្តែ បុរសម្នាក់ដែលលើកទូរស័ព្ទ បានប្រាប់ថា ម្ចាស់ស្ថានីយប្រេងឥន្ធនៈមួយនេះមិននៅកន្លែងធ្វើការនោះឡើយ។
លោកថា៖ «ខ្ញុំអត់ដឹងដែរ ព្រោះខ្ញុំជំនួសគាត់ ដោយសារគាត់ទៅក្រសួងថ្ងៃហ្នឹង»។
ប៉ុន្តែ បើតាមលិខិតរបស់អាជ្ញាធរខណ្ឌចំការមនចុះថ្ងៃទី៨ ខែកក្កដានេះ បានអះអាងថា ម្ចាស់ស្ថានីយប្រេងឥន្ធនៈកាល់តិច បានស្នើសុំអាជ្ញាធរជួយចាត់វិធានការដើម្បីធានាអាជីវកម្មរបស់ខ្លួន ខណៈមានព័ត៌មានថា នឹងមានការជួបជុំគ្នាប្រារព្ធខួបលោក កែម ឡី នៅទីនោះរយៈពេល ២ថ្ងៃចាប់ពីថ្ងៃទី៩ ដល់ទី១០ ខែកក្កដានេះ។
រដ្ឋបាលខណ្ឌចំការមន និយាយក្នុងលិខិតនោះថា អាជ្ញាធរមានសមត្ថកិច្ចនឹងចាត់វិធានការមិនឱ្យមានការជួបជុំនៅស្ថានីយប្រេងឥន្ធនៈកាល់តិចនោះ ក្រោមហេតុផលថា «ដើម្បីធានាបាននូវសន្តិសុខ និងសណ្តាប់ធ្នាប់សាធារណៈ»។
លោក កែម ឡី ត្រូវខ្មាន់កាំភ្លើងបាញ់សម្លាប់នៅថ្ងៃទី១០ ខែកក្កដា ឆ្នាំ២០១៦ ក្នុងស្តាម៉ាតម្ដុំស្តុបបូកគោ ហើយមានតែបុរសម្នាក់ឈ្មោះ អឿត អាង ដែលហៅខ្លួនឯងថា ជួប សម្លាប់ តែម្នាក់គត់ត្រូវបានចាប់ខ្លួន និងកាត់ទោសឱ្យជាប់ពន្ធនាគារអស់មួយជីវិត។
នាយករងអង្គការលីកាដូ លោក អំ សំអាត និយាយថា វិធានការរឹតបណ្តឹងសេរីភាពជួបជុំ និងបែបសាសនាជាការប៉ះពាល់មុខមាត់រដ្ឋាភិបាលលើឆាកអន្តរជាតិ។
លោក អំ សំអាត ប្រាប់ថា៖ «ខ្ញុំជឿថា គេ[អឺរ៉ុប]អាចនឹងដាក់បន្ទុកសម្រាប់ការបំបិទសេរីភាពសម្រាប់ពលរដ្ឋបន្ថែមទៀត ដោយសារតែអាជ្ញាធរដែលបានរារាំង។ អាជ្ញាធរជាអ្នកបង្ក ជាអ្នកធ្វើសកម្មភាព តែរដ្ឋាភិបាលជាអ្នកទទួលនូវការរិះគន់»។
ក្រុមអង្គការការពារសិទ្ធិមនុស្សជាតិ និងអន្តរជាតិ ៣០ស្ថាប័ន កាលពីថ្ងៃព្រហស្បតិ៍ម្សិលមិញ ជំរុញទៅអាជ្ញាធរកម្ពុជាឱ្យបង្កើតក្រុមស៊ើបអង្កេតឯករាជ្យមួយ ដើម្បីស្វែងរកយុត្តិធម៌នៅក្នុងសំណុំរឿងឃាតកម្មមួយនេះ។
ស្ថានទូតអាមេរិកប្រចាំកម្ពុជា នៅថ្ងៃនេះ តាមរយៈហ្វេសប៊ុករបស់ខ្លួន បានជំរុញជាថ្មីទៀតទៅអាជ្ញាធរកម្ពុជាឱ្យធ្វើការស៊ើបអង្កេតប្រកបដោយតម្លាភាព ដើម្បីស្វែងរកអ្នកពាក់ព័ន្ធនៅក្នុងសំណុំរឿងឃាតកម្មលោក កែម ឡី កាលពី៤ឆ្នាំមុន។
សហរដ្ឋអាមេរិកចាត់ទុកលោក កែម ឡី គឺជាបុគ្គលគួរឱ្យគោរព«យ៉ាងជ្រាលជ្រៅ» ជាអ្នកចូលរួមលើកកម្ពស់លទ្ធិប្រជាធិបតេយ្យនៅកម្ពុជា និងបកស្រាយការពិតដោយគ្មានភាពភ័យខ្លាច៕