ស្ថានទូតអាមេរិកប្រចាំកម្ពុជា ជំរុញសារជាថ្មីទៅអាជ្ញាធរកម្ពុជាឱ្យធ្វើការស៊ើបអង្កេតប្រកបដោយតម្លាភាព ដើម្បីស្វែងរកអ្នកពាក់ព័ន្ធនៅក្នុងសំណុំរឿងឃាតកម្មលោក កែម ឡី កាលពី៤ឆ្នាំមុន។
លើទំព័រហ្វេសប៊ុករបស់ខ្លួននៅថ្ងៃនេះ ស្ថានទូតអាមេរិកប្រចាំកម្ពុជា បានចាត់ទុកលោក កែម ឡី គឺជាបុគ្គលគួរឱ្យគោរព«យ៉ាងជ្រាលជ្រៅ»ជាអ្នកចូលរួមលើកកម្ពស់លទ្ធិប្រជាធិបតេយ្យនៅកម្ពុជា និងបកស្រាយការពិតដោយគ្មានភាពភ័យខ្លាច។
ខណៈដែលឃាតកម្មលើអ្នកវិភាគនយោបាយដ៏ល្បីល្បាញរូបនេះបានកន្លងផុតទៅ ៤ឆ្នាំហើយនោះ ស្ថានទូតអាមេរិកបានអំពាវនាវជាថ្មីឱ្យមានការស៊ើបអង្កេតពេញលេញ និងប្រកបដោយតម្លាភាពក្នុងសំណុំរឿងមួយនេះ។
ក្រៅពីស្ថានទូតអាមេរិក ក្រុមអង្គការការពារសិទ្ធិមនុស្សជាតិ និងអន្តរជាតិ ៣០ស្ថាប័ន ក៏បានជំរុញទៅអាជ្ញាធរកម្ពុជាឱ្យបង្កើតក្រុមស៊ើបអង្កេតឯករាជ្យមួយ ដើម្បីស្វែងរកយុត្តិធម៌នៅក្នុងសំណុំរឿងឃាតកម្មមួយនេះ។
លោក កែម ឡី ត្រូវបានខ្មាន់កំាំភ្លើងបាញ់សម្លាប់ទាំងកណ្ដាលថ្ងៃចែសនៅក្នុងម៉ាតមួយកន្លែងស្ថិតនៅបរិវេណស្ថានីយប្រេងឥន្ធនៈនៅម្ដុំស្តុបបូកគោ ក្នុងរាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។
ប៉ុន្តែ ឆ្លើយតបនឹងវីអូឌីកាលពីថ្ងៃម្សិលមិញនេះ អ្នកនាំពាក្យក្រសួងយុត្តិធម៌ លោក ជិន ម៉ាលីន ច្រានចោលការទាមទាររបស់ក្រុមអង្គការការពារសិទ្ធិមនុស្សទាំងនោះ ដោយចាត់ទុកការទាមទារនោះជាការធ្វើនយោបាយលើសពលោក កែម ឡី។
មានតែបុរសម្នាក់គត់ឈ្មោះ អឿត អាង ដែលហៅខ្លួនឯងថា ជួប សម្លាប់ ត្រូវបានសមត្ថកិច្ចចាប់ខ្លួនបានភ្លាមៗក្រោយឃាតកម្មកើតឡើង ហើយត្រូវបានកាត់ទោសឱ្យជាប់ពន្ធនាគារអស់មួយជីវិតនៅក្នុងសំណុំរឿងឃាតកម្មមួយនេះ។
សំណុំរឿងឃាតកម្មលើលោក កែម ឡី ត្រូវបានបំបែកជាពីរ មួយគឺផ្តោតលើបុគ្គលឈ្មោះ អឿត អាង និងមួយទៀតផ្តោតលើការស៊ើបអង្កេតរកអ្នកពាក់ព័ន្ធ និងអ្នកនៅពីក្រោយខ្នងបុគ្គលនេះ។
បុគ្គល អឿត អាង ត្រូវបានតុលាការកំពូលផ្តន្ទាទោសឱ្យជាប់គុក១ជីវិត កាលពីខែឧសភាឆ្នាំ២០១៩។ ចំណែកឯសំណុំរឿងមួយទៀតស្ថិតនៅក្នុងដៃចៅក្រមស៊ើបសួរនៅឡើយ។ សាច់ញាតិ និងអ្នកគាំទ្ររបស់លោក កែម ឡី នៅតែទទូចឱ្យអាជ្ញាធរវែកមុខរកអ្នកនៅពីក្រោយខ្នងនៃអំពើឃាតកម្មនេះ៕