ក្រសួងសុខាភិបាល ប្រកាសពីការព្យាបាលអ្នកជំងឺកូវីដ១៩ចំនួន ០២នាក់បន្ថែមទៀតជាសះស្បើយ ដែលធ្វើឱ្យអ្នកជាសះស្បើយសរុបនៅទូទាំងប្រទេសមានចំនួន ២៥៣នាក់។
ក្នុងសេចក្តីប្រកាសព័ត៌មាននៅថ្ងៃនេះ ក្រសួងសុខាភិបាលឱ្យដឹងថា អ្នកជាសះស្បើយទាំង ២នាក់ មានជនជាតិខ្មែរម្នាក់ និងម្នាក់ទៀតជាជនជាតិកាហ្សាក់ស្តង់។
ក្រសួងបន្តថា បុរសជនជាតិខ្មែរម្នាក់ រស់នៅស្រុកសំពៅលូននៅខេត្តបាត់ដំបង និងជាអ្នកធ្វើដំណើរតាមជើងហោះហើរមកពីប្រទេសរុស្សី ដែលបានបន្តជើងហោះហើរពីប្រទេសម៉ាឡេស៊ី មកដល់កម្ពុជាកាលពីថ្ងៃទី១៩ ខែកក្កដា ឆ្នាំ២០២០។
ដោយឡែកស្ត្រីជនជាតិកាហ្សាក់ស្តង់ គឺជាអ្នកដំណើរមកពីប្រទេសកាហ្សាក់ស្តង់ បន្តជើងហោះហើរពីប្រទេសកូរ៉េខាងត្បូង មកដល់ប្រទេសកម្ពុជានៅថ្ងៃទី៣ ខែសីហា ឆ្នាំ២០២០។
ក្រសួងបញ្ជាក់ថា អ្នកជាសះស្បើយទាំងពីរនាក់ត្រូវអនុញ្ញាតឱ្យចាកចេញពីមន្ទីរពេទ្យហើយ បន្ទាប់ធ្វើលទ្ធផលតេស្តអវិជ្ជមានវីរុសកូវីដ-១៩ ចំនួន០២ដង។
គិតត្រឹមថ្ងៃនេះ កម្ពុជារកឃើញអ្នកផ្ទុកជំងឺកូវីដ១៩ សរុប ២៧៣នាក់ ក្នុងនោះ ស្រី្ត ៥៤នាក់ និងបុរស ២១៩នាក់។ ក្នុងចំណោម អ្នកឆ្លងកូវីដ ២៧៣នាក់ គឺអ្នកដែលព្យាបានជាសះស្បើយសរុប ២៥៣នាក់ ហើយនៅសល់ ២០នាក់ កំពុងសម្រាកព្យាបាលនៅមន្ទីរពេទ្យ៕
